古天后日誌｜人民幣反彈轉強 港股有望向上挑戰多條平均線

7月12日，大致天晴，初時局部地區有驟雨，日間酷熱。美國喺今晚公布CPI前夕，市場憧憬美國通脹回落，加息壓力大減，三大指數做好，道指更接近全日高位收市，升317點；標指升29點；納指升75點。

微軟獲三藩市法院批准收購動視暴雪，意味美國聯邦貿易委員會(FTC)阻撓交易的行動失敗。消息公布後，動視暴雪股價炒高10%，微軟反覆轉升0.2%。呢個消息對科網股有支撐作用，科網股普遍向好。至於中概股亦靠穩，反映中概股表現嘅金龍指數隔晚升逾1%，預期今日港股嘅科網股可以帶動港股向上挑戰阻力。

美元回軟，美匯指數回落至近101，人民幣轉強，兌美元離岸價跌穿7.2，加上官媒表示支持企業發展政策有望加快出台，令港股氣氛改善。雖然恒指於周一及周二仍以陰燭收市，但兩個交易日合共升近300點，隔晚美股做好，帶動ADR再升90點，預計今日港股可繼續高開。若然能突破10日線並企穩18800水平，短期走勢好轉，本月低位可能就係上周所見嘅約18300水平，並上望向上進一步挑戰20/50及250日線，較大阻力為上周高位18973，萬九水平要睇能否收復。不過要繼續向上挑戰，今日需守18600至18700水平，而18400-18500關則不容有失。

不過港股最大問題仍然係缺水，始終無成交配合，即使大市氣氛好轉向上挑戰，仍然係要步步為營，雖然古天后一值睇淡後市，但短線反彈就無謂對著幹，只要今日能首度重返10日線並企穩，港股就有機會繼續向上挑戰多條平均線。不過港股仍然似乎上落市居多，大市即使反彈而未有成交配合，反彈都只不過係持貨者嘅一度逃生門。