古天后日誌 |北水坐唔定 港股有排未到牛市收集期 「扭轉劣勢靠長線基金入場」

7月4日，短暫時間有陽光，天氣炎熱，間中有幾陣驟雨，初時局部地區雨勢較大及有雷暴。美國股市噚日半日市，今晩獨立日假期休市。半日市下，美股較為淡靜，略為低開後，喺Tesla急升帶動下，市場氣氛向好，三大指數半日市皆上升收場，標指守住4300水平再衝高，但至4450動力開始減弱，目前支持睇高一線去4350。

嚟緊周四將公布初領失業金人數及小非農就業數據，週五有公布非農數字，估計就業會轉弱，失業率或微降至3.6%，但要留意時薪增幅，估計是增加4.2%，薪金增長係通張回升嘅最大威脅。噚晚金龍指數表現唔錯，主要係內地公布6月份新能源汽車交付，反應銷情相當理想，不過有獲利盤趁高出貨，汽車三傻高開低走，升幅收窄。留意中概股自今年2月起已見資金流出，資金都係趁好消息出貨。

至於港股7月首個交易日開盤向上，下半年睇落有個唔錯開始，恒指噚日大升390點，重上10日線，相信跟住會繼續挑戰20/50及250日線。只不過成交額只有897億元，入市資金仍有限，北水更錄得淨流出20億元。北水仍然係坐唔定，亦唔見有新資金入場，講到底，只係挾淡倉。不過5月份見咗18000低位後反彈，至20200水平再掉頭，回落至18800水平又向上，似乎7月有機會重覆呢個節奏炒上落。咁7月開局能夠上得返10日及20日線，目前先睇返向上先，大市首個阻力係19400-19500，企得到19500，再向上挑戰19800-20000，只係一直喺成交薄弱嘅情況下，要企穩20000大關轉勢又談何容易。既然如此，港股現貨市場都係難搞，目前就只能望住個指數炒上落做人，港股要扭轉劣勢回復升勢，怕且要有長線基金肯入場收集一段較長時間，波幅收窄，指數再唔出現急插急升，港股方有機會進入牛市收集期。