名人雜誌丨Lucy媽媽爆愛女絶密成長片段 籌備三年出新書封肚唔生有大計

李璨琛（Sam）和太太梁志瑩（Sophia）育有兩名可愛寶貝女，轉眼間，大女李元元（Lucy）已經5歲，而細女李斐斐（Sucy）則4個多月大。向來活潑可愛的Lucy深受網民喜愛，社交平台更坐擁40萬粉絲，Sophia為囡囡Lucy推出新書《露西的微笑》，內容收錄了99%從未曝光的照片，更有Lucy親自繪畫的圖畫，而新書經過三年時間的籌備，絕對是Sophia的「第三胎」，而Sophia接受本報獨家訪問時更宣布「封肚」直言：「兩個夠晒數」

訪問當日，Lucy細心閱讀新書《露西的微笑》，她亦向記者分享自己最喜歡的一張相片，並甜笑表示：「我鍾意呢張，因為有朋友。」十分可愛。

Sophia就挑選了這張Lucy拿着「肥」字的認字咭，並笑言:「點解我最鍾意呢張相，因為IG嗰陣唔俾我寫個肥字，所以我就喺呢本書到誓死都要寫個肥字！哈哈

李璨琛太太Sophia籌備三年，終於推出新書《露西的微笑》，新書由封面、內容鋪排設計、如何呈現及文字均由她一手包辦，Lucy 亦親筆繪畫書中插畫。

訪問前，Lucy主動要求媽咪為她查唇膏，的確貪靚！

Lucy的搞笑生活片段被媽媽分享到社交平台，發放正能量，隨着細妹Sucy出世，粉絲人數當然有增冇減。升呢做家姐 ，Lucy 除了沒有呷醋，更化身小助手主動照顧妹妹，Sophia透露：「我覺得湊小朋友唔吃力，我自己都enjoy，同埋Lucy都已經五歲，好多嘢佢都可以自己搞掂，例如沖涼，換衫返學，佢完全可以自己照顧自己，佢仲可以幫手照顧到妹妹，所以而家妹妹出咗世，我都唔會覺得好混亂。（你屬於耐性派？）哈哈，一時時，工人姐姐都有幫手照顧妹妹，不過主要都係做家務，我同老公就負責湊妹妹。」而乖乖坐在旁邊的Lucy 即爭着領功問：「媽咪，咁我呢？我有試過餵奶，攞尿片！」Sophia更大讚Lucy 成日都會望住細妹，妹妹流口水、大便會第一時間報告，「佢會好似一個security guard 咁喺旁邊看住妹妹。」Lucy再補充︰「同埋我會看住妹妹唔好食手！」認真盡責！

訪問當日，Lucy帶了私伙超強勁吹泡泡，和大家玩得十分投人。

Sophia向來十分喜歡小朋友，見她亦十分享受湊女時光，問到會否計畫再追多個？現年41歲的她，直言兩個夠晒數，她説︰「唔會再生喇，兩個夠喇！主要係我年紀問題，所以我諗真係唔會再生！」

當日Sophia宣布有第二胎，不少粉絲比Lucy媽媽還要興奮，今年2月她誕下細女Sucy，細妹與家姐Lucy猶如餅印。

至於Lucy的爸爸李璨琛，因為工作經常要周圍飛，但他一有空檔定必陪伴家人，更會分擔湊女。雖然有老公做家庭經濟支柱，但Sophia認為女人應該要獨立自主，更堅決表示：「我好快就會出返嚟工作，生完細妹我都即刻去進修紋眉，嚟緊我會主力紋眉事業發展！」

Lucy的社交平台坐擁40萬粉絲，經常為大家帶來了不少歡樂，不少讀者會和Sophia分享每當遇到負能量時，看到Lucy趣怪的生活照都會暫忘煩惱，會心微笑。新書中Sophia亦都向未來的LuLu寫下感受︰「你看，媽媽都曾經為你寫下這些快樂的文字，希望將來的你看到會感到了不起！」不過人紅自然是非多，有網民指責Sophia推囡囡去拋頭露面，成為網紅。

對此，Sophia曾在網上回應，並霸氣選擇繼續做自己喜歡和認為是對的事：「Lucy每次往外工作，就像去了一個更大的遊樂場，玩得比我更開心，對於沿路會指責或嘲笑我們兩母女的一小撮人（希望係），對不起，我們並沒有按照你們喜歡的方式生活，是因為：我就是我，你就是你。有人只願用兩分鐘泡個麵，有人卻願意花上三小時熬個湯。每個人都應該順應自己的意願去生活，才是對自己最好的交代！」看見Lucy工作時專業、投入、認真又帶點童真的態度更是超乎大家的預期。

《露西的微笑》收錄了Lucy 99%從未曝光的珍貴相片及其親筆繪畫。

問到Sophia會否繼續讓Lucy間中接Job，她表示：「大前提係Lucy開心，相信到某一個位可能都冇咁多人搵佢做嘢，可能去到八、九歲就自然唔會，我冇特別set咗一個界限。」再問到Lucy其實是否知道自己「紅」？Sophia謂：「LuLu其實唔知道自己咁受歡迎，但佢最近好似隱隱約約知道」Fans」係乜嘢一回事，又好似知啲唔知啲咁！」其實，每次Lucy 出街都會遇到不少途人找她合照，Sophia亦曾在社交平台分享Lucy時而答應，時而拒絕的原因，她曾經好奇問Lucy：「BB呀，其實你係用咩嘢去決定同唔同啲人影相嘅呢？」Lucy搞笑回答：「感覺！」十分有個性。

Lucy媽媽Sophia 十分享受湊女時光，更，她記錄女兒生活日常，將「李家」正能量帶給大家。

談到新書《露西的微笑》，梁志瑩直言新書籌備過程長達三年，當中收錄了很多Lucy從未曝光的成長片段，配上「李老母 」Sophia的鬼馬描述，絕對是嘔心瀝血之作。她透露：「通常夜晚佢哋瞓晒我就最多靈感，我亦會好似午夜凶鈴咁，喺嗰個時候打俾製作部朋友，同佢地表達我想點樣做。其實一開頭我開咗另外一個社交平台帳號，得我一個人睇到，個帳號就好似lucy.is.good Ig 咁寫咗三百幾個post，一得閒就寫，之後就將嗰啲post抽出嚟放落新書，再手寫書入面嘅內容。」問到Lucy是否了解自己出書是甚麼一回事，Sophia笑稱︰「略略都知道，佢會知道係有一本書嘅物體，不過因為拖咗太耐，有時佢想搵我玩，我就同佢講媽媽整緊你本書啲嘢，跟住就會問我『又整書？』。我係一個好old school嘅人，鍾意剪剪貼貼，呢部分我都有叫佢幫手，所以佢都會知道本書入邊有好多呢啲相，過程中佢就有多啲概念知道本書係點樣。」

新書推出前，李燦琛一家四口齊齊幫手Pack貨給預售的讀者，Sophia和Lucy更會在今日7月2日舉行簽名會，答謝一直支持他們的粉絲。

訪問當日，Lucy乖乖的坐在媽媽身旁，向來表演慾強的她突然問媽咪：「一會兒可否跳返part舞？」，十分搞笑。待訪問結束後，Lucy即應大家邀請，熟練地表演BLACKPINK成員Jisoo的《FLOWER》開花舞，全程跟足拍子啱晒beat，好過癮！暑假將至，問到Lucy現時有沒有參加興趣班，Sophia表示：「暫時冇參加課外活動，可能暑假會帶佢參加興趣班，搵樣嘢學！」而Lucy就自言最希望學游水，更威水表示因為自己能夠在水中睜開眼睛，這個理由跟Lucy搞鬼性格絕對吻合！
 

《星島頭條》新網站有更多精彩內容：http://www.stheadline.com/