古天后日誌｜市場憧憬中美關係緩和續反彈

6月7日，大致多雲，間中有狂風驟雨，兩勢有時頗大，天氣悶熱。隔晚議息前美股表現反覆，股份個別發展，道指早段受波音拖累下跌，收市回升10點；標指跟納指則分別升10點及46點，仍然係靠重磅科技股FAAMG力撐大市，美股暫時都仲係幾硬淨。

虛幣市場又爆鑊，Coinbase遭美國政府起訴，股價低開20%後，最終以大成交出陽，反映有買盤趁吸納。Coinbase公布業績後，已見有買盤介入。當時比特幣亦回升5%至27000以上，目前資本市場嘅各樣工具，仍然係好淡角力。

美國考慮要求銀行提升最低資本要求至20%，銀行股先跌後回升，市場情緒仍然偏樂觀，對利淡消息反應唔大。不過國多家銀行正以打折方式出售手上商廈貸款，以減少損失。可見未來商廈融資會變得更加困難。據資料顯示，首季度美國全國商廈空置率升至18.6%，其中以接近三藩市矽谷成為重災區。

隔晚反映中概股嘅金龍指數急升，連帶ADR及夜期亦升至19300水平，原因係美國國務卿未來幾週會訪問中國，本來中國之行係2月嘅事，但當時因為美國擊落中國嘅偵測氣球，令雙方關係惡化，訪華之行亦取消。如今再提訪華之旅，市場憧憬中美關係緩和，中概股急升，帶動港股持續反彈。

雖然港股繼續挾淡倉，但A股卻繼續向下尋底，上證更失守3200大關，並跌破大型橫行區，創業格指數更跌至去年低位附近，資金不斷流出，深滬兩市成交縮減至1萬億之下。噚晚再有消息指阿爺有意降準，意味阿爺打算放水，更有消息指阿爺要求國有銀行減息，放水消息叫做幫一幫上證險守3200。內地房企出事，阿爺以減息抗衡，但卻引起資金外流。

至於港股噚日升至20日線卻未能企穩，不過夜期受消息帶動再挾返上去，不過噚日嘅成交額只係一千億鬆啲，連日反彈成交都未見配合，挾淡倉意味濃到出汁。暫時走勢係技術反彈，今日大市跟隨夜期高開，若未能進一步向上突破，再失20日線嘅話，港股呢一輪反彈好大機會完結。相反今日能高開高走，並成功向上突破250日線，企穩19600水平，或能扭轉自1月以嚟展開嘅調整浪。不過欠缺成交配合，古天后都係傾向相信短線只係技術反彈，要修復250日線打大佬談何容易。