恒生密密出招拓展大灣區市場

大灣區通關之後嘅營商氣氛極速升溫，香港貿發局趁勢喺上星期復辦通關後首個跨境商貿論壇SmartHK，畀各大企業發掘灣區內緊密發展嘅商機，吸引到商界猛人雲集，包括近排馬不停蹄嘅恒生銀行一姐Diana 亦帶領眾管理層組團到廣州參與。

恒生管理層分別參與SmartHK唔同活動，仲特別支持當中嘅大灣區青年企業家峰會，講到明一直同青年創業家同行，如果企業發展大灣區時有咩需要，銀行會盡力提供支援。

聽聞恒生為咗迎合大灣區中小企需要，嚟緊會推出更多配合跨境服務需要嘅數碼方案，甚至增強網點服務，令到企業喺大灣區營商更加方便。

講起要拓展大灣區，原來恒生中國喺2007年成立至今都即將近廿年，大灣區內地業務已經佔佢哋業務三分之一，所以恒生一直睇實通關嘅時機，喺香港同廣州都設立咗跨境財富管理中心，無論內地同香港都可以雙向咁服務跨境理財客，據聞短期內仲會「添食」，好快就喺內地開多一間跨境財富管理中心。