古天后日誌｜港股少做少錯 唔做唔錯

5月22日，天氣炎熱，部份時間有陽光，稍後有幾陣驟雨。上周五美股由升轉跌，主要係有關債務上限談判再度陷入僵局，三大指數報跌收市。道指跌109點；標指跌6點；納指跌30點。納指升至12800阻力，首日開出陰燭，而標指亦踏入4200-4300阻力區，同樣開出陰燭。

雖然債務上限談判再陷僵局，不過每次債務上限談判亦如此，唔到最後限期，談判雙方都絕不退讓，即係喺6月1日限期前，雙方仍會擺出唔妥協嘅姿態，但到死線兩黨最終都會達成協議，唔會畀債務違約呢件事發生。除咗美債上限談判外，上周五鮑爺發言時，總算唔再放鷹，暗示6月偏向唔再加息，鮑爺金口一開，6月加息機會由35%降至10%，10年債息升至3.72%後回落。預期美息見咗個頂，但通脹核心數據未見大大回落，6月後核心CPI更有機會回升，要留意本周五公布嘅4月PCE數據表現。

市場對於美國經濟陷入衰退與否有不同意見，過往美國多年QE放水，令全球資金濫泛，熱錢太多。雖然去年美國開始加息收水，但市場仍然充斥大量高息產品，加息亦無法令熱錢從市場流回銀行體系之內，間接令聯儲局嘅貨幣政策未能有效地控制市場資金流向。

A股經過第一季阿爺大力放水後，3月份出現超大額借貸，3月嘅經濟數據略見起色，無奈到4月份數據又回復弱勢。而1月及3月阿爺放水，資金流入A股，當時成交額亦增加至逾萬億元。但當4月份嘅經濟數據不似預期，之前湧入A股嘅資金，喺5月趁A股上咗高位開始套現離場，最近A股成交亦從月初過萬億元，減至8500億元左右。上證指數高衝3400後回落，創指反彈目前險守2200，反映炒A股嘅資金陸續離場，而非持續買入。

至於港股仍然係一場悶局，近呢半個月恒指喺19300至20300之間千點上落，但成交維持薄弱，指數即使喺二萬水平樓下，仍未見資金喺低位入場，資金只係喺唔同板塊之間輪動短炒，高位有資金乘機走貨，尤其當幾隻重磅科網股，業績前後炒上，升勢都係曇花一現，其後都係派發，博業績嘅全部淪為韭菜又被割。港股目前嘅狀況，係少做少錯，唔做唔錯，呢個亦係港股成交一直淡靜嘅原因。