獨家丨菊梓喬嬲豬被指整容:化妝師手勢唔同「一姐」靜晒自言難得放慢腳步

2023-05-17 07:00

菊梓喬（Hana）相隔4年再於九展舉行個唱，人逢喜事精神爽，有得開騷連個樣都靚啲，之前她於澳門個唱中，因為現場音響出現故障導致耳膜嚴重受傷，Hana求診後出po貼靚相報平安，不過網民錯重點，指她驚現「間尺鼻」，Hana呼冤指每個化妝師手勢唔同，她根本冇靚過，最多只係化妝叻咗。採訪：方騫平攝影：鄧國良髮型：nicki_ting 場地：富薈旺角酒店

Hana曾經捱過，明白人生總有順景逆景，目前難得可以放慢腳步。

人逢喜事精神爽，菊梓喬有得開騷連個樣都靚啲。

Hana4年來一直想開show，無奈受疫情耽誤。

菊梓喬嬲豬被指整容。

菊梓喬唔會邀請吳卓羲做個唱嘉賓。

菊梓喬於本月20及21日舉行《Hanafinity演唱會2023》，Hana坦言4年來一直想開show，無奈受疫情耽誤，直至開關後，去年11月及今年2月才有機會分別到美國及澳門演唱，今次香港個唱都係突如其來，她快速於3小時內敲定：「𠵱家世事變化咁大，唔知會發生乜事，有機會我梗係𦧲飯應。」

Hana為個唱綵排。

之前悉心打扮出席個唱記招。

菊梓喬着低胸裝影演唱會海報。

讚吳卓羲𠱁得人好開心

Hana同吳卓羲關係非一般，但她強調唔會邀請對方做嘉賓，亦只會安排家人睇show，問到屆時會否有「好消息」宣布？她笑住耍太極說：「我會宣布呢個show只係開始，因為公司幫我plan緊巡演。」雖然乜都冇預吳卓羲，但讚返對方係好搞笑嘅人，見到佢會好開心。

2022年Hana出席除夕騷，吳卓羲帶家人來撐場。

之前受力捧嘅Hana喺九展舉行《只想與你在一起》處女個唱，一度感動落淚。

去年底Hana終於去到美國登台。

曾被封為「星夢一姐」嘅Hana，近年因為唱片公司人事變動少咗曝光，𠵱家由何麗全領導下的TMG改捧炎明熹、JW等，對此，Hana聲稱冇Hard feeling，因樂壇要有妹妹、有哥哥才會百花齊放，她從不覺得自己係一姐，今年她主力做巡演。Hana聲稱小時候被父母遺棄，做童工捱大妹妹都過得到，明白到人生總有高有低，𠵱家又唔係冇得唱歌，難得有機會放慢腳步，她反而最介意被指整容，一定要解釋。「每位化妝師手勢唔同，懷疑當日未化完個妝就去見記者，所以個樣睇落有啲膠膠哋。」她唔介意素顏俾觀眾睇清真面目，前提係要有善長喺籌款節目中捐500萬落妝費。Hana自言唔夠靚都想整容，咁靚咗就唔使唱歌，做model影相都搵到食。