頭條戲場丨《寶驚魂》導演唔好咁黐線啦好唔好?

2023-05-05 09:00

入場前：已知片長三個鐘、屬超現實黑色恐怖喜劇、《祖孽》導演Ari Aster久違四年新作、加Joaquin Phoenix孭飛，咁嘅配搭當然睇咗先算。

散場後：從未睇過一套戲嘅男主角可以咁慘，成世俾老母思想控制兼情緒勒索，大個咗仲要繼承老母所有負能量。一套黐孖筋嘅戲，唔係鬧佢，真係一套導演撚化觀眾嘅戲，睇完幾日先消化到，想俾導演洗腦，想好deep咁follow導演潛入恐懼黑洞，買飛啦笨。(上映中)撰文:廖思慧

佢係阿寶，因為撞車所以周身傷，其實個意外係可以避免嘅。

全片有好多阿寶回憶加幻想片段，虛實間交錯，認真便輸了

童年阿寶同阿媽上遊輪玩，呢幕見到佢阿媽自私一面，衰老母

因為被露宿者霸咗間屋，阿寶要瞓街

因為住嘅區域有露體狂殺手，阿寶又係冇著衫所以被誤會

劇情講述單親家庭長大嘅男人阿寶(Joaquin Phoenix飾)，為咗逃離專橫恐怖阿媽嘅魔掌，一條友住喺一處光天化日下殺人都冇人理嘅罪惡城市，由一個地獄搬去另一個地獄。因為應承咗阿媽回鄉探親，更專登去睇定心理醫生，講你都唔信嘅怪事接連發生，完全破壞阿寶嘅行程，然後阿媽突然死咗，探親變奔喪，是旦啦都係要起行。導演透過一位唔識自己解決問題的中年男人返家之旅，帶觀眾經歷一場又一場強烈衝擊的痛苦體驗。

絕望先最痛苦
開首已交代電影屬超現實黑色恐怖喜劇，唔一定有隻鬼或者連環殺人犯同你玩失驚無神恭喜你先叫恐怖，做咗咁多年人，其實精神折磨或心理恐懼仲得人驚，而呢套戲最令我心寒係絕望，「冇人幫到你㗎嘞，你死咗條心啦。」同埋有啲位真係會引到你笑，不過係苦笑，慘到呢。

阿寶撞車後，被撞佢嘅夫婦收留治療，呢兩公婆表面和善實際就毒過屎

夫婦嘅女，好憎阿寶但更憎父母，自殘方法相當新穎

就係個夫婦嘅女人，你睇佢幾唔正常，嚇到阿寶即走

夫婦嘅男人，做醫生嘅，佢身後嗰位係死裡逃生嘅美軍，都係唔正常嘅

導演你落地獄
片長達179 分鐘，其實體感唔止呢個數。電影評價超兩極，鍾意嘅好鍾意，唔鍾意嘅會嬲自己浪費179分鐘時間，我就抱住睇吓導演可以有幾癲嘅心態，唔算難捱。其實個腦要幾咁黐線先會建構一個充滿惡意又冇好人嘅世界?想挑戰自己嘅可一試，唔好有任何預期，放鬆心情，跟住個黐線導演帶你遊地獄，最後你會發現導演唔止玩阿寶，仲玩鬼埋觀眾。