獨家丨馬志威冧讚偶像鄧麗欣靚得有韻味 《12日》本是不雅照片後栢芝復出作
2023-05-05 08:00 
導演林愛華相隔23年再有電影《十二夜》姊妹作《12日》推出，電影本為張栢芝度身訂造，但最終合作不成，好彩找到更合適的鄧麗欣（Stephy）演出，而首次跟偶像Stephy合作的馬志威好識做人，讚女神愈來愈靚兼有成熟韻味。採訪：杜杜 髮型:Alex So@The Attic化妝:Jenny Tziong
林導早在2010年已為張栢芝度身訂造《12日》，亦即不雅事件後兩年，「嗰時栢芝想復出，就同小寶（爾冬陞）簽咗3部戲，其中一部就搵咗我，嗰時佢都未離婚仲喺同謝霆鋒一齊，我就提議不如整個婚姻篇，佢都話好，但後尾唔知咩原因佢哋合作泡湯。」本來林導已放棄計劃，怎料因《十二夜》推出20周年重映，當時她被追問有否續集計劃，「我話有，不過冇投資者，結果伍總（伍健雄）聽到就話做投資者。」
貪馬志威內地多人識
《十二夜》以拍拖為主，《12日》則講婚姻，男女主角亦變成馬志威和Stephy。林導認為Stephy是不二選擇，「要做10年喎！要後生得，成熟又得，Stephy本身個年齡層啱，佢10年嚟好似一樣樣咁，保鮮期好犀利，冇咗啲baby fat仲靚咗，同埋演技都成熟咗。」而37歲馬志威就勝在未拍過Stephy有新鮮感，加上有內地巿場，「佢之前有個劇類似咁嘅角色（內地劇《三十而已》），風流倜儻嘅女人殺手，大陸比較熟識佢都唔錯。」
被林導踢爆是Stephy 粉絲的馬志威，講到同偶像合作超緊張，但同時亦好興奮，「細細個都喜歡Stephy，細個就覺得佢好青春好靚，好女神！但合作後覺得佢比以前更加靚，佢𠵱家有種成熟嘅韻味，同埋佢係好專業嘅演員，都會畀意見我，叫我放鬆又好引導到我投入場戲，所以真係好多謝Stephy。」問到會否像Stephy一樣，演完電影對婚姻有新領悟呢？剛宣佈跟拍拖多年的圈外女友Moireen分手的馬志威就直言，「暫時我對婚姻都冇乜睇法，哈哈！兩個人一齊開心就OK，係咪一定要簽字？名份冇乜所謂。」
《星島頭條》新網站有更多精彩內容：http://www.stheadline.com/
最新回應