獨家丨周吉佩多謝網民負評想做曾志偉愛駒最窮戶口得兩位數要問舊愛借錢

2023-05-05 07:00

周吉佩(吉吉)以「死唔斷氣」精神，在《中年好聲音登峯之戰》勝出。被指爆冷奪冠的他，形容自己似足去年澳門打毗賽，曾志偉愛駒「不醉無歸」從後居上贏馬的狀況，吉吉坦言想成為志偉嘅愛駒：「我成世人都係喺落後位置，多謝志偉哥舉辦《中年好聲音》節目，令我有追上嚟嘅機會。」採訪：方騫平攝影：譚志光

周吉佩成為《中年好聲音》冠軍，得來不易。

吉吉都幾有觀眾緣。

吉吉冇諗過係咪「虛火」，只求見步行步。

吉吉最委屈，莫過當年網民用粗口鬧他。

最霉時都受過白眼。

周吉佩在比賽當晚分數由頭帶到尾最後Win埋，他覺得難以置信及好夢幻，又指之前有幾round失準得好緊要，甚至冇晒信心，連自己都覺得foul硬：「做乜啫，唱到咁？」他答得老實稱自己贏在僥倖，正如前輩所講，比賽如跑馬，狀態好緊要，他志在參與一個party，豁出去之後反而有超水準表現。對於無綫總經理曾志偉為他平反「造馬疑雲」，吉吉稱他對6強都好好，更稱志偉的愛駒「不醉無歸」好似自己：「喺志偉哥70大壽生日會上，重溫去年『不醉無歸』參加澳門打毗賽嘅精彩片段，片中『不醉無歸』曾轉彎失蹄以致失位，但去到直路修正仍以超級姿態贏馬，而我今次亦唔信自己會跑贏，以為自己排最後，原來真係有爆冷嘅可能性，亦希望大家睇到我嘅實力。」

周吉佩感激曾志偉舉辦《中年好聲年》節目，令他能「鹹魚翻生」。

吉吉喺曾志偉70歲生日會上，睇到佢愛駒參加澳門打毗賽從後居上贏馬片段。

周吉佩曾演出失準，憑復活戰才能「翻生」，且愈戰愈勇。

最後6強，周吉佩、李佳、龍婷、吳大強、羅啟豪、顏志恒。

吉吉唔止唱功好觀眾緣都唔錯，公開演出獲鐵粉應援。

「死唔斷氣」難聽過粗口

36歲嘅吉吉追夢星途大起大落，2007年22歲時參加有線《線動真音樂全港公開賽》奪得亞軍受力捧，參賽後第二年就推出EP，以為從此有運行原來是「一碟歌手」，死心不息的他跟朋友組樂隊sp’ACE。入行15年來受過唔少白眼，連公司reception都睇佢唔起：「我得獎時佢哋有同我打招呼，離開公司嗰日，當唔識我，嗰刻明白到Nobody係唔會得到尊重。」歌星夢碎後令他經歷一段黑暗日子，「慣咗做『明星』成日搭的士出入，最燶時銀行得返60幾蚊，要搵前女友賒住一百蚊，冇錢惟有頹喺屋企，嫲嫲、爺爺見我冇工開都好擔心，真係連自己都睇唔起自己。」

2015年吉吉組樂隊sp'ACE再出過一張EP，2019年於麥花臣舉辦sp'ACE《Our Gravity》演唱會，樂隊翌年解散。

sp'ACE 2019年《Our Gravity演唱會》。

吉吉曾推出個人EP《Getting Start》。

2007年，吉吉曾參加有線《線動真音樂全港歌唱大賽》奪亞軍入行，當年冠軍是陳皓恩，季軍曹敏寶。

汪東城、唐禹哲、周吉佩當年公開活動相遇。

曾跟閻奕格參加歌唱比賽。

至於最委屈，莫過於網民用粗口鬧他，「話我係奀星都叫識得我，見我再組樂隊，話我『死唔斷氣』、『要紅都紅咗啦。』真係難聽過粗口」，不過經歷過谷底生活的吉吉坦言「如果唔係有咁嘅經歴，可能仲係好頹，又真係死唔斷氣先有今日，所以做人真係要爭氣，要堅持。」諗通晒的他更會記住所有負評，「唔係記仇，會記住鬧我嘅不足，咪做好啲我嘅嘢，用行動回報評論，亦可以成為小朋友教材，真係要多謝當日話我死唔斷氣嘅網民。」

有過谷底經歷，吉吉向老婆黃彥欣承諾，會先照顧好家庭才去追夢。

吉吉有幸福家庭，唔再好似以前咁任性。

曾獲譚詠麟贈言要鬥長命

人生重現光彩的吉吉好感激譚詠麟當年嘅鼓勵：「當日喺有線大廈我送過唱片畀佢，佢讚我把聲幾好，叫我加油，之後喺黎瑞恩紅館後台又相遇，校長對我有印象，叮囑我『呢行係鬥長命，唔好放棄』。校長嘅格言，好聽係鬥長命，其實同樣係帶出死唔斷氣另一個意義；至於黎瑞恩不單當年畀機會sp’ACE做佢紅館個唱表演嘉賓，仲教我要飲水思源及謙虛。」吉吉坦言唔知呢次會唔會係『虛火』，可能好似當年一樣轉頭落返嚟，經驗之談叫佢唔好諗得太長遠，一步步行做好𠵱家先。