古天后日誌｜港股乏成交 北水回歸亦難有作為

5月4日，早晚部份時間多雲，日間大致天晴，天氣炎熱。美國聯儲局一如預期加息0.25%，會後聲明亦如預期刪除進一步加息字眼，不過鮑爺未有放鴿，並表示今年唔會減息，美股終告倒跌收場，三大指數齊跌。道指跌270點；標指跌28點，失守4100短線支持；納指跌55點。美股有機會轉勢，加上業績期快完結，小心提防美股出現較大調整。

為咗防範銀行爆煲潮擴散，聯儲局嘅會後聲明暗示息口見頂，不過鮑爺仍然口硬，未有放鴿，之前美股炒減息，如今鮑爺死口唔表示今年會減息，美股借勢回調亦合理。留意美債息喺加息0.25%後未見上升，10年債息回落至3.33%，市場已預期9月或開始減息，年息4.65%為目標嘅話，9月減息0.25%後，12月再減0.25%機會唔細。

息口走勢仍然主導美股升跌，但通脹目前仍然高企，CPI未來兩個月料將受房價及房租回落而向下，但回吐幅度未必會好似第一季度咁大。3月核心PCE出現回升，服務性通脹仍然相當頑固，工資增長仍然係拉升通脹嘅兇手。4月底待業職位跌破千萬份，有機會打壓一下工資升幅，但週三剛公佈嘅「小非農」就業人數高達29.6萬人，遠高於預期的14.8萬人，3月銀行危機並未令中小企減低請人意欲，呢方面仲要多加留意。

睇返業績期過咗一段時間，標指超過一半企業派咗成績表，盈利平均只倒退3.7%，遠勝過預期倒退6.7%，目前標指市盈率大約19倍，目前美股吸引力仍較美債高少少。呢個係美股回吐都見有買盤吸納嘅原因。

至於港股都真係無乜好講，北水缺席嘅日子，成交進一步萎縮，噚日成交額只有662億元，少到嚇死人，雖然上月中大市升抵20800水平時，成交額增至1365億元，當時坊間有人解讀為基金出手買貨。相反古天后見到係重磅股持續有股東高位沽貨套現，若然真係基金入場買貨，大市無理由喺20000水平樓下唔繼續買貨，成交日漸萎縮，呢個亦係古天后一直唔睇好港股後市嘅原因。港股已成棄嬰係不爭事實，港元持續流走，反映外資一去無回頭，既無成交配合，單憑北水力量，港股又可以走得幾遠。今日北水回歸，唔加多腳大力沽貨已萬幸，港股都係維持有波幅，冇升幅嘅狀態，叫邊個肯入場同你鬥傻。