頭條戲場 丨《命案》祝大家長命百歲

電影主題是銀河映像最拿手的宿命論，一個精神分裂的風水佬冒癲拯救心理變態後生仔的故事。有種師兄弟歸位的感覺，由一開埸緊張到散場，全程Keep住坐立不安，濃烈黑色幽默及血腥暴力，集懸疑、驚悚、查案於一身，有唔少笑位仲要幾勵志，好睇喎。(上映中)  撰文:廖思慧
 

家棟住喺天台屋，好多重要戲份都係天台發生，呢幕又癲又鬼上身又正常，辛苦晒家棟。

因為劇情需要，Lokman在戲中經常食煙亦會講粗口，演得自然奔放。

中文戲名好易令人誤會係一般查案片，叫《命‧案》會唔會好啲?英文片名《Mad Fate》直譯瘋狂的命運，清楚明白晒。父母都有精神病的林家棟遇上嗜血茶餐廳太子爺楊樂文(Lokman)，經過多種算命方法知道對方會有一個火山級大劫，「好大鑊，橫跨20年。」家棟為幫對方改命搞到自己又癲又喪仲爭啲死。根本兩個人都唔正常，拍埋一齊睇吓邊個條命夠硬。

因為曾經錯過一啲嘢，家棟好想幫人，見到Lokman「赤脈貫睛」隨時殺人，盡救。

改唔到命就試吓改心，努力唸經等心境平靜。

家棟認為放生好大功德，可幫Lokman積福，但個天好有性格，唔係你畀就要，最終搞到成地雀屍，陰功。

做一個善良的人
《命案》個命係人命亦解作命水，好多人成日都話點解我老竇唔係李嘉誠？好醜真係命生成？戲中有大量改命加改運方法，例如忌火就咪食煙、屋企千祈咪放空雀籠、多行善、吉利說話要常講。究竟「一切皆是命，半點不由人。」還是「萬般皆是心，點點皆由人?」電影就係話你知，「你係可以揀嘅。」全場最印象深刻警察、兇手、熱血風水佬及天生PK仔在麵店同場一幕，嗰種一觸即發真係睇到要深呼吸，好耐未試過睇港產片有如此觀感。

家棟飾演江湖術士，紫微八字起卦乜都識，勉強幫到人但幫唔到自己。

Lokman對血有特別喜好，冇得解天生嘅，所以話佢變態其實好無辜，你估佢想㗎?

為幫Lokman改命，家棟怪招盡出，包括同死人換命。

被迫換命嘅Lokman，你睇佢幾驚。

電影節奏明快，回味無窮，家棟由頭帶到尾，陳湛文令人心寒，Lokman非常有驚喜，論演戲他絕對是MIRROR的上弦，祝在影壇海闊天空。最重要臨尾竟然被安慰到，多謝導演。

伍詠詩飾演一樓一，貪錢又爛賭，同樣有大劫，仲搬正喺Lokman隔籬，累鬥累。

睇新聞睇得多，啲變態殺手或者無差別殺人犯個樣都好普通，但內心好兇殘。

吳廷燁飾演警察，拉過童年Lokman，認定佢係變態人渣，睇死佢冇得改。

家棟經常望個天，究竟天命難違還是人定勝天?

《星島頭條》新網站有更多精彩內容：http://www.stheadline.com/