古天后日誌｜寧買貴莫買錯 醒目資金棄港股取美股

4月14日，大致多雲，日間短暫時間有陽光，日間天氣溫暖。美國周三公布CPI略低於市場預期，雖然聯儲局仍有官員在當晚放鷹，但隔晚公布PPI同比僅上升2.7%，進一步確認通脹正降溫，喺通脹暫無壓力下，美股隔晚做好，三大指數上升。道指升383點，重返34000水平；標指亦成功突破4100阻力，升54點；納指更升236點，升幅接近2%。今晚將有銀行股揭開業績期序幕，即管睇下美國如何渡過今次業績期。

CPI跟PPI公布後，市場樂觀情緒升溫，雖然聯儲局喺5月可能仍會繼續加息0.25%，但利率大有機會見頂，市場更有人預期最快喺7月減息，不過古天后則傾向相信，5月加息0.25%後，只會暫停加息，聯儲局未必會喺咁短時間之內，由加息轉減息，總得只停止加息再作觀察，至少需要三兩個月作為緩衝期，較大機會係至第四季先開始減息。

美國嘅重磅企業自去年第四季開始裁員，唔少分析認為裁員潮下，令民眾變得不願消費，但睇返全球最大的奢侈品供應商LVMH 集團，首季度營收增加17%，遠超預期9%，其中以時裝及皮革製品增幅最大，留意呢啲貨品都非必需品，而係因應喜惡而買入嘅消費品，換句話講，消費市場並未有因為裁員潮受重大影響。呢個亦正正反映，美國實體經濟未見大差，即使坊間不斷有預測指美國經濟今年或陷入衰退，呢一點古天后從不認同，美國經濟確有機會放緩，但就未至於陷入衰退咁大鑊。呢個亦係古天后認為美股可以逢回吐就趁低吸納嘅原因。

美股隔晚氣氛良好，連帶周三晚插水嘅中概股亦見反彈，盤前又見所謂AI概念股作動，知乎(ZH)公布大搞AI「知海圖AI」，盤前股價一度急升17%，不過開市後高位乏承接，最終收市僅升1.6%，升幅大大縮水。其他中概股雖有反彈，只不過反彈力度一般，未能成功收復上日失地。

至於港股噚日低開高走，最終竟能轉燈倒升收市，唔少人認為港股轉強，但全日成交不足1100億元，咁嘅成交叫人點相信港股係真有資金流入推升大市。講到底自3月份開始，港股都只不過係區間上落，個別股份又係好消息出貨，百度(09888)玩ChatGPT，阿里(09988)跟京東(09618)玩重組分拆，通通都係好消息出貨，百度更已跌穿140元，幾乎打回原形，阿里亦未能回復紅底股身份，京東更加係一直跑贏，講到尾就係外資唔信你中概股，尤其經過舊年嘅嚴厲監管，乜嘢都係阿爺說了事，外資怕咗中概股所謂政策風險，同樣係AI概念，倒不如買美股嘅MSFT其至NVDA，畀貴少少都唔願平買中概，呢個亦係港股愈玩愈縮嘅原因，投資者只會捨難取易，港股畀中資大控制，入場屢屢被割韭菜，試問醒目資金又點會原意入場做點心。