獨家丨劉穎鏇最怕Fans留言講佢身材為《隱形戰隊》操到可以參加健身比賽

2023-04-13 06:00

劉穎鏇（Tiffany）在《隱形戰隊》演反恐特勤隊「刑風」搏盡拍打戲，又着埋3點式大騷「最強Body」，因為表現唔錫身被激讚。講到性感相出現在各大討論區又被傳媒瘋狂報導，Tiffany唔介意繼續做打女或性感演出，但就好怕睇Fans留言談論其身材。另外，事業搏殺期的她唔心急拍拖，未來男友最好似彭于晏咁高大。採訪：杜杜攝影：朱偉彥服裝:Magazzin Group

樣甜身材又好的Tiffany，成為新一代女神。

Tiffany坦言拍《隱形》是最辛苦一套劇，為營造反恐特勤隊的外形，她瘋狂健身操肌，能達到水平好難得，「一次比一次肌肉量增加，會愈嚟愈重，但體脂就跌咗好多，最低得返10.1%，能夠達到呢個水平已經好好，似去參加健身比賽。」她亦不介意繼續騷「最強Body」，但怕fans留言談論她身材，「哈哈！我好似filter咗，講太多呢啲我會睇唔到，我諗佢哋講呢啲唔係想我尷尬，有佢哋支持已經OK。」

樣甜身材又好的Tiffany，成為新一代女神。

劇中玩「小背心放題」的Tiffany，打起來特別養眼。

專心事業唔急拍拖

雖然Tiffany唔介意繼續做打女，但就怕身體應付唔到，「每次拍都一定會有瘀傷、小受傷，好彩冇乜大礙，但太多都唔太好，所以除咗打戲都希望有其他方面嘅嘗試。」原來Tiffany未入行前想過做護士，所以都希望挑戰醫護角色，「以前會諗醫生講嘅名詞好複雜，護士可以講少啲，但𠵱家會同自己講，唔好畀呢啲對白或者中文困擾自己，無論咩困難都要面對。」

Tiffany為演反恐特勤隊成員，拍攝前瘋狂操肌。

貴為新一代女神的Tiffany都有男神，「彭于晏，我覺得佢靚仔！」不過對於男友外形，身高176cm的她強調唔一定要靚仔，但對高度有要求，「想平頭囉！女仔都會想個男仔高啲有安全感，又唔使好fit，但係要健康囉！」另外，她又認為性格較外形更重要，「對人尊重，對屋企人同朋友好，可以睇到一個男仔為人好唔好。」不過25歲的她未心急拍拖，「仲未照顧到自己，想做多啲成績先。」