巴士MMA｜老翁疑咳兩聲惹不滿 遭3男女捉腳擸拐杖狂揪

車廂爭拗不時發生，今日九巴車廂上演一幕MMA暴力場面，影片上載社交平台後，惹來大批網民熱議。上載者稱有關影片是E31路線九巴車廂，一名老翁疑因「咳咗兩聲」，引來同車乘客不滿，之後雙方發生爭執繼而動武。一名灰衫長髮女子狂毆老翁多拳，鄰座藍衫男子亦捉住老翁的左腳阻止他出腳傷人，而坐在前方的一名老婦亦加入戰團，不斷用拐杖襲擊老翁，現場一片混亂。

格鬥場面發生在E31線九巴，影片全長約38秒，上載者聲稱事發於今日（11日）下午1時40分左右，當時巴士由愉景新城巴士站前往東涌，至青衣附近時，一名戴太陽眼鏡、坐在下層逃生門旁邊的老翁突然「咳了兩聲」，之後坐在旁邊的灰衫長髮女子以咳嗽聲還擊，「個女人特登好大聲咁咳咗幾聲，然後隔離藍衫白髮男人就好似玩咁樣，特登除口罩望住阿伯方向咳兩聲，然後個女人就望住阿伯話『我都識咳』，阿伯笑笑口話『我都識』」。

老婦突然加入戰團，用拐杖襲擊老翁。網上片段截圖

老翁被打到鞋都飛脫。網上片段截圖

現場一片混亂。網上片段截圖

現場一片混亂。網上片段截圖

灰衫女不斷出拳狂毆老翁。網上片段截圖

藍衫男用手捉住老翁左腳。網上片段截圖

老婦用拐杖襲擊老翁。網上片段截圖

老翁寡不敵眾被圍攻。網上片段截圖

上載者指雙方初時僅口舌之爭，灰衫女亦開始講粗口大鬧老翁，未幾一名坐在附近的老婦突然調位坐在老翁對面，「我擔心佢哋有咩衝突所以即刻調咗位，然後拐杖阿婆唔知因乜事加入戰團，拎起拐杖襲擊阿伯」。她形容當時場面非常混亂，情況一發不可收拾，「灰衫長髮女人同拐杖阿婆瘋狂超狼死咁襲擊阿伯，阿伯俾佢哋打到帽、太陽眼鏡、鞋都飛埋出嚟，阿婆仲係咁攞支柺杖打阿伯同插阿伯，阿伯全程處於下風齋擋冇還手，個白髮藍衫男人唔知做乜嘢係咁捉住阿伯隻腳，得阿伯俾個女人同阿婆係咁打」。

從她拍攝的片段所見，在場所有乘客不斷大叫，希望4人能夠停手，「喂喂喂！報警啦報警！收手啦！你哋唔可以咁嫁」，惟4人未有理會他人勸喻，反而繼續拳拳到肉，其後有人通知車長，車長立即將車停低之後上前了解。

上載者在帖文中透露，司機指4人不停手繼續爭執便會報警，又要求他們分開坐，但灰衫女仍不肯停口繼續鬧，「最後阿伯一直瞌埋眼，直至我落車嗰陣諗咗一諗，我都有啲擔心阿伯，因為個女人坐咗去第二個位之後，阿伯一直都係合埋眼，於是我行返去前門嗰度敲門，同司機講叫佢睇一睇阿伯同report畀公司，因為阿伯一直瞌埋眼我都擔心佢有咩事」。上載者又補充，當時全車人都有喝止及叫4人停手，亦有叫司機上前調停事件，又指若自己亦行近或變成毆鬥，故「唔係拍片者不救，係不能救」。

事件引起網民熱議，有人批評老翁非常無辜，縱使戴上口罩咳嗽亦無任何問題，反而其餘3人則過份敏感，「一定唔係驚傳染，只係大家都好燥底，搵人出氣」、「咁怕死，就唔好出街啦」、「搭程巴士都可以打交」、「阿伯咳有帶口罩有咩問題」、「阿伯好無辜」、「證明防疫加強了人與人之間的憎恨」。

九巴發言人表示，周二（4月11日）下午一時許，龍運E31線的車長因聽到車尾有爭吵聲，於是停車了解事件，車長到場後已沒有人動武，涉事乘客亦表示毋須報警處理，車長其後繼續行車。

-----

《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料: https://bit.ly/3IMunqd
你的獨家報料一旦被採用及報導，將獲得乙份獎品。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ