頭條戲場丨《微笑與夏溫》完勝《七月與安生》

2023-04-06 06:00

從來一段關係眼中只有對方都是病態，不論是情人還是友人。電影是《七月與安生》的韓國重拍版，而《七月》改編自內地小說。入場前兩樣都冇睇過，很好，當新戲睇。之後抽時間睇返《七月》，四個字，韓版完勝。電影3月23日先上映，但今日開始只剩返一間戲院播放，仲要每日只得一場，如此一套細膩動人，講成長講陪伴的電影，情感渲染力之強真的不能只有我睇到。(上映中)撰文:廖思慧

幾款海報都好靚

男女主角海報

老友互拍海報

閨密版

濟州版

電影在韓國一上映，已榮登新片票房冠軍，在韓國知名電影網「DAUM 電影」觀眾評分高達8.9分，CGV電影院觀眾滿意度更達到95%，口碑超勁，連宋慧喬都讚超好睇！

電影由金多美、全少妮及邊佑錫孭飛，韓版同原版劇情有八成一樣。講述1998年夏天，經常轉校的安微笑（金多美飾）同阿媽搬到濟州，同學仔高夏溫（全少妮飾）主動撩佢玩，小朋友嘻嘻哈哈笑兩笑就成為好朋友。之後微笑唔願再跟阿媽四圍走，留在夏溫身邊一齊食一齊瞓一齊返學。終極閨密齊升上高中，少女心事的夏溫暗戀同校的咸鎮佑（邊佑錫飾），校花溝仔隔重紙巾，靚仔靚女襯到絕，自此微笑、夏溫與鎮佑幾乎形影不離，埋下出事的伏線。三人在多年間交織出又笑又喊又心動又眷戀又嫉妒又仇恨又不捨又難過的成長故事。

微笑同夏溫由細玩到大, 一齊畫畫一齊養貓

一齊同貓瞓,神仙咁嘅生活

做朋友做到有負擔
微笑因為父母長期唔喺身邊，生活自由想點就點，有書唔讀跟男朋友去首爾過新生活，被「掉低」的夏溫好難過，但同時又有啲鬆一口氣，因為佢發現男友同微笑關係唔多正常，然後兩女由互愛變互相傷害，浴室攤牌一幕，眼淚九秒九噴出嚟，唔係講笑，散場後個心隱隱作痛，痛足幾個港鐵站。

升讀高中,兩人坐住綿羊仔四圍去玩

全少妮演夏溫,劇集作品唔多但演夏溫好有驚喜

金多美唔使多講,一個眼神已交代好多嘢,佢做戲真係好好睇

三人行注定出事

加繪畫元素好聰明
導演閔永根在韓版放入原版沒有的繪畫元素，作為微笑及夏溫觸發情感的開關掣，兩位女角從小喜歡繪畫，全片亦以畫作反映兩人截然不同的性格及喜好，而最後兩人攜手完成了最後畫作，靈魂合二為一的深層次較《七月》高得多，最重要男主角冇原版咁乞人憎，亦是金多美的人生代表作，每日得返一場，真係唔知講咩好。