獨家丨57歲吳國敬17年情玩完慘被分手大灣區搵食同女友長期分隔異地

2023-03-28 07:00

3年多的疫情，不少圈中人慘食穀種，其中轉戰幕後多年，偶然以唱作人身份演出的吳國敬，為「撲水」照顧拍拖17年的女友Elaine及金毛愛犬金金，決定到大灣區一帶搵食，最後落腳中山搞音樂！不過根據可靠消息，因為長期相隔異地，57歲的阿敬已慘被分手，𠵱家兩袖清風孤伶伶重新出發。記者傳短訊求證分手一事，阿敬即啟動拒收訊息功能，明白嘅，年過半百俾女飛，心情一定難受。採訪：娛樂組

失戀吳國敬日前以嘉賓身份出席「仁美清叙」晚宴時強顏歡笑。

吳國敬同Elaine相戀17年，以往經常po相放閃。

香港疫情已過，市民生活亦回復正常，一班資深歌手如許冠傑、梁詠琪、黃凱芹及呂方等個個出嚟開騷「跑數」，但作過《對你太在乎》、《越吻越傷心》及《玩火》等好歌嘅吳國敬無人問津，主力在內地發展的他日前回港幾日，出席完「仁美清叙」成立32周年晚宴及酒樓活動後匆匆返回大灣區，為兩餐頻撲中港兩地。

吳國敬最近以嘉賓身份出席「仁美清叙」晚宴。

來去匆匆又北上。

坐食山崩要慳啲使

疫情令吳國敬入不敷支，連共過患難的女友都走埋。據知情者向頭條日報爆料：「其實阿敬好顧家，將辛苦錢盡量滿足女友，每年會去高級餐廳慶生，無奈近年真係搵唔到食，起居生活上都配合唔到Elaine要求，加上年復一年儲唔到老婆本，又聚少離多，兩人經唔起疫情考驗，情海翻波玩完，就算阿敬力挽，向Elaine承諾會瞓身搵錢都搞唔掂，一把年紀被女飛，相當慘情。」3年前吳國敬曾在訪問中透露，疫情下好多job都要押後及取消，見財化水，坐食山崩要慳啲使，加上投資咗哥哥喺美國開嘅海鮮餐廳亦失利，諸事不順。