咪錶抄牌起爭執 黑衣男阻警抄錶又爆粗 遭鎖手扣帶署

抄牌抄到要被警察上孖葉？昨晚網上傳出多段短片，拍得一名穿街坊裝踢拖鞋的黑衣男子，與數名警員為抄牌一事爭執，片中黑衣男指自己為座駕入錶，但聲稱有警員「 㩒住我隻手唔畀我入」，結果慘吃「牛肉乾」，黑衣男扯火破口大罵，最後被警員鎖上手扣帶署調查。

拍片位置是石硤尾偉智街3號寶血會上智英文書院對開的路邊，該處有一列咪錶泊位。短片是晚上拍攝，當時一名身材較胖的黑衣男，與數名警員在街頭理論，黑衣男顯得情緒激動，向警員解釋自己已為座駕入錶。「我話俾你聽，頭先嗰一刻我諗住補錶，我係入咗錶，15分鐘前入咗，佢（警察）返返嚟，嗰時係未過鐘，但佢㩒住我隻手唔畀我入（錶），跟住話要我攞身分證帶我走，轉過頭就搵人抄牌，你話我嬲唔嬲？你話我嬲唔嬲？（好大聲）」

黑衣男與數名警員就抄牌事件理論。網片截圖

一名相信是黑衣男的女親友問警員:「咁你有冇㩒住佢先得架？你㩒住人哋隻手唔畀人入錶嘛！」網片截圖

黑衣男情緒激動指有警察「 㩒住我隻手唔畀我入錶」。網片截圖

黑衣男走到其他車輛前拿走告票指要幫隔離鄰舍俾埋320元。網片截圖

片段顯示黑衣男被反鎖雙手。網片截圖

黑衣男被雙手反鎖。網片截圖

黑衣男指自己被警察指控「喧嘩」要帶署調查。網片截圖

黑衣男被帶署調查。網片截圖

由於黑衣男情緒激動，聲浪頗大，警員不時着他冷靜，又說「我聽到你講乜」，不過，黑衣男仍然怒氣沖沖，「我320我畀唔起咩?嗱，宜家我隔離鄰舍我都幫佢畀埋！」片中見他拿走其中一部私家車的告票放在手中，然後再粗言怒罵在場警員，「不過我條氣唔Ｘ順咋，你嘅態度唔Ｘ得，你行為呀！點解要㩒住我隻手呀？你覺得你啱咩？」

當時有數名街坊圍觀事件，亦有人用手機拍下過程，黑衣男未有避忌，「你（警員）睇呀，咁多個企喺度聽我講，你點樣衰！你估我哋好蝦咩！」

接着另一條影片拍得黑衣男被數名警員包圍，其中有警員勸說「先生你冷靜小小先」，黑衣男仍重複說：「頭先邊個㩒住我隻手？你話我冷唔冷靜？你話我可唔可以冷靜？你講吖！」其時一名相信是黑衣男的女親人出現，向警員詢問「咁你有冇㩒住佢先得架？你㩒住人哋隻手唔畀人入錶嘛！」

最後一條片已拍得黑衣男被數名警員包圍，其中一名警員將他雙手反鎖手扣，其間一把女聲問道「佢犯咩嘢法?」黑衣男大聲說「佢話我喧嘩！」一名較高級的白制服警官隨即高聲喝道：「得啦，我哋影晒，唔好再講，我哋講晒，影晒！」其間警員拉起封鎖線，並向圍觀者表示「唔好阻警察做嘢！」

其間黑衣男投訴雙手被反扣弄痛，頻呼「唔得，唔得，隻手.......」有警員表示「上車慢慢攪，好文明架，香港」，旁邊有拍攝者笑言「文明抄牌」。

影片上載到社交群組，網民反應不一，「如果真係㩒住人隻手唔比人入錶又真係好似有啲....」、「警察都到咗抄緊牌，入錶已經太遲啦」，亦有人認為毋須小事化大。「何必呢，320比佢啦，依家十倍都搞唔掂」、「  320蚊咪當跌左囉！攪到比人落孖業幾肉酸！」

警方表示，本周三（15日）晚10時左右，一名姓趙（44歲）男子報案，指因沒有入錶與警員爭執，警員到場調查期間，趙情緒激動及叫囂，最終涉公眾地方行為不檢被捕帶署。

知情人士稱，警員當日收到有人報案指汽車阻塞，於是前去處理，見到事主的咪表逾時，準備抄牌時，趙突然跑回來，警員給他口頭警告便離開，沒有發出告票。警員在附近處理其他車輛，約半小時後折返，發現該車仍然沒有入咪錶，深水埗軍裝巡邏小隊人員上前執法時，趙又再次從附近跑回來，當時情緒激動不停爆粗，企圖擾亂警員，並用手遮擋咪錶上的條碼（bar code） 阻止警員發告票，繼續吵鬧。警員為防範其阻礙正在發出告票的人員執行職務，遮擋條碼，故用手擋開趙，警員當時有錄影作證，其後拘捕趙涉公眾地方行為不檢。

---

《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料: https://bit.ly/3IMunqd
你的獨家報料一旦被採用及報導，將獲得乙份獎品。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ