頭條戲場丨《鈴芽之旅》只有自己才能拯救自己

新海誠災難三部曲最好睇之作，繼續源自「311」，以天災為題，場景從九州至四國再到關西至尾站東京，交通工具包含渡輪及山陽新幹線，屬三部曲中覆蓋最多縣市的一套，是縱貫日本的公路片。唔打算吹捧畫面有幾靚，對於新海誠，基本啦。(上映中)撰文:廖思慧

如果真係有一道門，閂埋後世界就唔會有災難，就好嘞。

居於九州的高中少女鈴芽，由於是311地震倖存者，曾經與死亡擦身而過，因此有睇到「後門」、門後「常世」世界及象徵災禍的「蚯蚓」出洞的能力，因為手多多誤打開廢墟中的「後門」，又解放了鎮守「蚯蚓」竄出，引爆地震的「要石」，更令「關門師」草太被詛咒並附於三腳椅，因為內疚及好奇心，鈴芽離家出走，同有思想的三腳椅齊踏上拯救日本鎖「門」兼尋找自我之旅。

鈴芽踩單車返學途中遇見草太，因為對方一條問題令佢選擇逃學。

好多評論覺得男女主角情感發展太突然，其實感覺嘅嘢邊話得埋。

宗像草太將引發「災害」的門關上，身任「關門 師」一職的神秘青年。

芹澤朋也是草太的朋友，言行粗魯，好關心朋友。

岩戶環是鈴芽的阿姨，於漁協工作的。

岩戶椿芽是鈴芽的母親。

 

正能量無限提供
新海誠希望透過《鈴芽之旅》探討「災害」、「人情」及「重新起步」等主題。他認為故事中鈴芽面對過去的創傷、眼前的困境時，因旅途上遇到好心人的鼓勵未曾放棄，期望觀眾能與鈴芽產生共鳴，得到前往未來的勇氣。導演將大地震怪物化，以「蚯蚓」的形態展現， 而廢墟及鈴芽母親都是災後的投射，一切盡在不言中，最記得「蚯蚓」一出現，全民手機即響地震警報，睇戲已經覺得好壓抑，在當地生活應該好易有PTSD。

因為草太受傷，鈴芽帶佢返屋企止血，其實全片冇一個壞人，世界觀真美好。

為咗將草太變返人，鈴芽千里追貓，上社交平台發現佢嘅蹤影，Twitter上的Tag真實存在。

佢係大臣，本來係 「要石」，因為鈴芽嘅釋放，變成識得講人話嘅白貓，最鍾意整鬼草太同鈴芽。

神戶酒吧老闆娘的一對孖仔，同會講嘢嘅椅子好好朋友，好笑。

聽到想喊的歌單
全片以大量80至90年代經典J-POP作連貫，聽到The Checkers及《銀河鐵道999》已經好驚喜，出鏡唔多，草太老友芹澤亦是好東西，皆因呢位有情有義的靚仔揸跑車載鈴芽尋找失蹤的草太，車途播放的公路歌單相當高質，松田聖子、松任谷由實、井上陽水、齊藤由貴及竹內瑪莉亞，聽到想喊。

故事好療癒，門鎖寓意超勁，鈴芽跟童年鈴芽對話含幾噸洋蔥，真的只有自己才能拯救自己，學習擁抱過去的傷痛，「遇見妳，真好」，第三度跟新海誠合作RADWIMPS ，配樂再加一千分。
 

《星島頭條》新網站有更多精彩內容：http://www.stheadline.com/