古天后日誌｜港股進入有波幅 冇升幅階段

3月14日，早上多雲，日間部份時間有陽光，天氣乾燥。隔晚美股表現反覆，繼SVB爆鑊後，美國再有兩間銀行被FDIC接管，包括FRC及SBNY同樣因為擠提出現動性不足，令市場再度陷入恐慌。美股先升後跌，道指早段一度升逾300點，收市跌90點；標指失守3900後，早段曾逼近3800支持後反彈，無奈反彈至3900前支持變阻力，最終跌5點收市，納指則升49點。

接連再有銀行被接管，市場情緒當然嚴重受損，雖然唔少人將今次SVB所引發嘅地方銀行擠提，或引發2008年嘅金融海嘯2.0，但古天后噚日嘅日誌已清楚指出兩者分別，古天后雖然對今次接連有銀行出現流動性問題未有掉以輕心，但亦未至太悲觀，與其將今次SVB事同2008年金融海嘯比較，似乎今次更加似去年英國退休基金被迫拋售英債有啲相似，只要央行能夠提供流動，問題應該可以順利解決。目前中小型銀行受影響更大，客戶將存款轉至較大型銀行，出現擠提對細銀行壓力較大。

其實今次小型銀行出現擠提，主要係之前喺寛鬆貨幣環境下，銀行存款急升，銀行將存款買入不同年期嘅國債，由於踏入加息周期，息率上升，債券價格喺兩年間由高位回落逾兩成，對銀行資產負債表構成一定壓力，若銀行本身現金流充裕，就唔使低位拋售債券以維持其流動性，但SVB就係因為存款大量流失，為應付現金流需求，逼住賤賣呢啲債券資產，加上喺美股下行之際進行集資，引致股價大跌，無法透過資本市場再融資，而引發今次事件。

本來喺通脹受控下，聯儲局已有意於明年開始掉頭減息，估計至2025年息率將回落至3%之下，屆時呢啲債券價格就能夠回升，中小型銀行亦可順利過渡，誰知FOMC班友係咁出口術放應，令市場相信聯儲局要繼續進取加息，令債價疲弱，SVB因為管理層嘅錯誤決定，資源錯配引致倒閉，繼而引發市場恐慌，地區性銀行出現短暫流動性短缺。FRC跟SBNY可以話死得無辜，前者雖然涉及唔少房地產借貸，但喺樓市轉弱下，未見大量拖欠供款，純因為SVB引發地區性銀行而出現流動性短缺。至於SBNY則涉及較多虛幣業務，帳薄上嘅抵押品或有機會出現不足。

不過經過呢幾日搞到咁大鑊，斷估下星期議息，都無乜資格再加0.5%，暫時市場預估加息0.25%嘅比例大約係65%，甚至已有35%估唔加息，並最快喺下半年減息，年底息率將下降至4%。當息率掉頭回落，而市場整體流動性回復正常，所謂金融海嘯2.0自然唔會發生。古天后一直對美股唔係睇得太淡，尤其當市場個個話美國經濟可能陷入衰退時，本欄已多次強調，喺就業市場保持強勁下，美國經濟唔會差得去邊，而今年美股係可以採取逢低吸納嘅策略。

至於港股呢，去到19300-19400水平，又回到12月及1月起步位，入場資金似乎變得較為積極，可惜港股整體動力亦係唔多夠，連本來強勢嘅電動車股因為減價戰插水，中概股亦未見有資金喺現水平大手接貨，暫時大市仍然係靠一批中字股支撐，港股進入有波幅，冇升幅階段。