頭條戲場丨《海邊電影院》如果你累了...

睇Olivia Colman演戲絕對是人生一大享受，戲中她叫Hilary，是戲院售票員，身材臃腫、面如死灰、皮膚鬆弛、仲要患精神病，角色由頭Sad到尾，以為咁就一世?之後遇上飽受歧視的黑人青年Stephen(Micheal Ward)，兩人互相救贖，結局充滿希望，攝影及配樂已上神枱。(上映中)撰文:廖思慧

電影發生於80年代，Hilary同Stephen由同事發展為戀人。

忘年戀仲要膚色有別，導演真大膽。

就係呢幕除夕天台睇煙花，兩個寂寞的心極速Connect。

《美麗有罪》金像大導演Sam Mendes繼金球獎最佳電影《1917：逆戰救兵》及《新鐵金剛：智破天凶城》後，首度獨力創作劇本，自編自導這套帶有自傳色彩的文藝片。因為疫症封城，導演有時間回望人生，坦然面對自己的成長回憶，包括家人備受精神病困擾的親身經歷，啟發他寫下《海邊電影院》的劇本，從中帶出動盪時代人與人之間的聯繫，以及電影、音樂和社群的療癒力量。

 

電影冇廢話好難得
電影故事發生在80年代，主旨是在黑暗中尋找光芒。戲中的一句對白「那一束小小的光，能讓你短暫逃離。」有人生活在光裡，卻感受不到光，同樣地，有人活在黑暗中，但看見曙光。無論是Hilary或Stephen都內藏極深傷痕，同樣代表黑暗。除夕夜，兩人在天台睇煙花，倒數聲中，煙花點亮整個夜空，昏黃的海邊戲院燈牌映照Hilary及Stephen，只用燈光及攝影已能好好講故事，最愛呢種鏡頭語言，兩度贏得奧斯卡大獎及總共獲得15次金像提名的攝影大師Roger Deakins真係好勁，鏡頭下的荒廢餐廳、灰暗天空甚至海岸線都Feel到一種浪漫又崎嶇的情感。

Colin Firth飾演人渣經理，出場一段時間先認到係佢。

戲院同事，個個性格鮮明。

一隻受傷的鴿將兩人距離拉近，以為搵到大家的救生艇。

Hilary搭上Stephen回春廿年，去遊樂場拍拖係咁笑。

戲院有一個荒廢餐廳，是兩人的親熱小天地。

兩人坐埋一邊吹水飲酒，Hilary覺得返工好快樂。

Hilary主力售票，同時要幫手喺影廳掃垃圾，入行後最深刻經歷係發現有觀眾死喺戲院。

做售票員多年，但Hilary都未入過放映廳睇戲。

 

導演重申戲院的必要性，因為有撫慰及治癒的功能。最後見到坐在戲院一角的Hilary，上揚的嘴角及濕潤的雙眼，放手唔容易，離開是一個新開始。電影先癲後暖，美術靚攝影極靚，願所有破碎靈魂都能搵到自己的避難所。

放映員Norman(Toby Jones飾)為做好角色，專誠學習放映電影膠片的工序和技巧，等自己似十足有20年經驗的放映員。

Norman同Hilary傾偈，前者有個仔但好多年冇見，每人都有一個故事。

電影在英國肯特郡北岸小鎮Margate取景拍攝，美指搵到一家充滿Art Deco風格的舊式豪華戲院連大舞廳。

當導演睇到呢個場地時即刻修改劇本，將部份劇情移師至大舞廳發生。

 

 

《星島頭條》新網站有更多精彩內容：http://www.stheadline.com/