獨行賊趁屋主去深圳連環爆屯門掃管笏村兩單位疑「收穫」豐富滿到瀉

2023-03-06 18:45

屯門掃管笏村日前發生連環爆竊案，姓陳屋主指賊人的背囊非常「脹卜卜」，疑收穫非常豐富。

屯門掃管笏村日前發生連環爆竊案，一名黑衫獨行賊潛入村屋單位內大肆搜掠，偷走一批現金及首飾。本網事後聯絡到兩位涉事住戶講述事件，其中更直言賊人竟在晚上7至8時犯案，非常「狼死」，又指現時每晚睡覺仍提心吊膽，擔心寓所會再被賊人「光顧」。

居於二樓的黃先生向記者表示，他與家人在上周五（3日）離家前往深圳，原定翌日晚上回港，正當他過關準備回家時，突然收到樓上住戶陳先生的來電，指自己的單位被人爆竊，失去一批金飾及現金，「佢問我個單位有冇事，我睇返屋企個cam，發現有個人喺廳行來行去，咁就知道肯定奶嘢」。

居於二樓的黃先生指自己損失一批金飾及現金。

黃先生指賊人爬水渠上去，之後再撬窗入內，而其電腦亦遺下懷疑屬於賊人的鞋印。

黃先生指賊人爬水渠上去，之後再撬窗入內。

賊人首先爬入二樓單位爆竊後，再爬上三樓單位犯案。

涉事村屋鄰近小巴站，平日都多人出出入入。

黃先生返抵寓所後，發現屋內一片混亂，之後細房的窗戶有被撬的痕迹，電腦上更留有一個懷疑屬於賊人的鞋印，經點算後發現一批金器、手錶及3萬元現金不翼而飛，總值約10多萬，「睇返個cam，個賊好短時間喺廳，主要係搜間房」。根據黃先生的形容，該名賊人戴帽、身穿黑衫黑褲及孭背囊的男子。

他指自己平日與樓上住戶陳先生甚少外出，基本上單位內一定有人，惟事發當日他與陳先生都離家去深圳，才被賊人有機可乘。他續指，CCTV片段顯示時發時間為晚上8時，地下單位當時有人，但賊人仍繼續入內爆竊，「我覺得個賊好大膽囉，嗰陣黃金時間，大約7點幾8點，地下有人有燈都夠膽擒入去，單位對住巴士站，星期六啲人行完山都會喺度等車，都幾多人出入，但佢都落手，真係好狼死」。

相關新聞：天眼直擊│掃管笏村竊匪又再出沒村民失10萬首飾財物

另外，住在三樓的陳先生亦透露，當日他亦北上到深圳，大約晚上9時半回來，豈料一入屋便驚見家中一片凌亂，經點算後大約8萬元金器及2萬元現金被盜去，「我喺屋企見到一條唔屬於我哋嘅吊咀頸鏈，後尾問返黃生，先知條鏈係屬於佢哋，我諗應該係爆完黃生嗰度，再爆我哋，其間個賊嘅背囊裝得太滿跌低咗」。