Anson Lo大爆3樣人生最寶貴東西興奮說服爸爸退休享清福

2023-03-03 17:30

「教主」盧瀚霆（Anson Lo）剛推出今年首支跳唱歌《MONEY》，今日（3日）現身商台接受《叱咤樂壇》訪問。早前在活動上暈倒的AL先向神徒報平安，精神奕奕的他表示已經好聽醫生話：「而家每日工作人員隨身都會準備一支水及補充糖份嘅運動飲品，因為醫生話電解質好重要，同埋唔需要食得太清淡，所以呢幾日我都迫自己食啲濃味嘅嘢，大家唔使擔心」。

AL今早到商台接受訪問。

大量神徒到商台等候偶像。

AL表示新歌《MONEY》是他目前最喜歡的一首跳唱歌，而且曲風亦明顯有所不同，玩味較重，作曲方面再與合作過《Megahit》及《Mr. Stranger》的韓國團隊聯手，今次第三度合作，AL大爆上次在《Mr. Stranger》時他聽了近100首Demo ，而今次在10多首demo 中，成功選中《MONEY》，他坦言揀歌需要很多意志力和時間。

AL表示新歌《MONEY》是他目前最喜歡的一首跳唱歌。

新歌《MONEY》主要講金錢不是萬能，身邊很多重要的東西如健康、親情、自信等等都買不到，AL透露創作此歌動力源自去年一些感受：「2022年尾比較大壓力，冇咁開心，嗰時就發覺就算而家較入行前經濟能力好咗，但快樂都唔係必然，無憂無慮係用錢衡量唔到」，他又回想出道前教跳舞，每月僅得$1400 收入，但其實當時都可以好快樂，所以便希望透過新歌去表達很多東西不能用金錢去衡量。問到2022年不開心的時候如何渡過，AL 坦言：「用了很多方法，包括用咗兩個月時間畀自己冷靜吓，多啲私人時間獨處，好勤力做Gym、做運動等等」。

AL指新歌《MONEY》主要講金錢不是萬能，身邊很多重要的東西如健康、親情、自信等等都買不到。

主持謝茜嘉問AL，如果有一個夾萬可以放三件最寶貴的物品會是什麼？AL首選是家人，「好開心今年可以成功說服到Daddy退休，呢樣嘢最proud of 自己，因為Daddy驚我辛苦，要擔起頭家好大壓力，所以說服咗佢好耐，但我好想佢哋享清福，行山放狗，我知道咁樣佢地會好開心。」不過AL就笑言平時做嘢隻腳已經好攰，所以不會陪他們行山，但有時間亦會陪家人打邊爐。

AL人生中最寶貴之首就是家人。

而第二樣寶貴的東西便是神徒，他感謝每一位神徒一路的支持，坦言大家真摯行為及純真的留言，一切都是金錢買不到的；至於第三樣便是跳唱能力，AL說：「自己好鍾意跳唱，冇咗會生存唔到，無論係大小舞台表演都會有跳舞唱歌，兩樣嘢combine 先至代表到自己，所以呢樣嘢我係唔會放棄。」

接著提到在錄音過程，AL 邊說邊做出多個趣怪動作，笑言：「今次需要很多聲音上嘅表情，係錄音時就做咗好多好誇張可愛表情，大家一齊扮鬼臉，鬥樣衰，迫出我內在幽默感出來，」在訪問中播出《MONEY》時，AL更一度跟着音樂大晒舞技，冧爆一眾神徒。

最後，AL預告今年除會推出慢歌、亦最少會出多一首不同風格的跳唱歌。最後問到入行5年對於快樂的定義有沒有改變，他表示：「當然有，而家對快樂嘅定義就係簡單，人開始大個，覺得簡單就是美，而家me time 只係會攤喺地下畀自己靜吓，好簡單舒服，同埋見到爹哋媽咪好健康，其實已經好開心。」

AL在商台逗留超過3小時，在下午約3點50分離開，商台門外已聚集了超過300名神徒等候，非常墟冚。離開商台前，AL走近欄杆，逐一接過神徒遞給他的過百份禮物，由於禮物太多，他接收後不時要遞給身旁的助手，期間有神徒將一隻他的Q版公仔拋入欄杆，而神徒亦不時大叫「撈撈呢邊呀！」、「等咗好耐喇！」及「食咗飯未？」等，大概20分鐘後，AL收完所有禮物準備登車時，他感謝大家的支持，更向大家說「下次見！」之後他在座駕上除了揮手外亦不忘為新歌宣傳，做出「Money 」手勢，而此時神徒亦湧向7人車，搞到險象環生，而最後AL在神徒列隊歡送下離開。