古天后日誌｜港股企穩10日線向上挑戰20及50日線

3月3日，天晴，天氣乾燥，日間天氣較為和暖，早晚溫差較大。美股隔晚先跌後回升，Tesla發布新車，股價卻跌逾半成，早段拖累港股氣氛，但午後多得聯儲局官員出嚟放鴿，令美股回升；道指升341點；標指則升30點，4000點仍有阻力，但3900支持又守穩咗；納指則升85點。美股目前走勢仍反覆，但並無大跌之慮，市場對息口走勢仍相當敏感。

隔晚美股得以回升，全靠聯儲局官員放鴿，亞特蘭大聯儲主席表示，加息喺第一季後能發揮作用打擊通脹，佢個人就偏向放慢加息步伐。不過10年債息未見反應，更升至4.07%近日高位，只係3月繼續加息早於意料之內，加上10年債息雖向上，但30年債息未有跟隨，反映10年債息更將見頂。睇返近日美股日升日跌，但並未見深度調整，虛幣市場表現硬朗，反映市場流動性仍相當充裕。而2年債息已轉趨穩定，基金亦於今年初重置資產，並開始分段買入美股。

唔少人認為今年美股或出現急跌崩盤，主要係擔心美國經濟陷入衰退，但從經濟數據去分析，美國經濟陷入衰退機會極低，加上通脹似乎已開始見頂回落，只係租金支出反映有所滯後，而工資增長亦未見減速，令通脹數字高居不下。但油價及資源價格從高位回落，加上減息已開始見成效，通脹亦已見頂。而對股價走勢最為重要係市場流動性是否充裕，雖然各地央行仍處於加息周期之中，但內地喺過去三個月，多次向市場注入流動性，更多資金投入令投資市場變得更為寬鬆。

至於港股周一見低位後反彈，重上10日線後噚日整固，成交額喺急升後調整略為縮減，可以話大市回升未見新資金流入，但同時亦反映低位反彈後，未見太大沽壓，暫時買賣兩閒。兩個舉行在即，若然今日港股隨美股回升，並錄得成交增加配合升勢，港股嘅反彈可持續。企穩10日線後，下一個目標當然係20日及50日線，大約係20750及20900左右，至於升抵呢兩條平均線後，就要睇有冇成交配合，若然成交額只係維持喺1300億樓下，上升動力不足，港股可能又係呆呆滯滯，日升日跌，唔會有太大作為。