古天后日誌｜現水平買貨已有一定防守性

2月27日，天晴，天氣乾燥，早上相當清涼。上周五美股又復下跌，主要係PCE強於預期，三大指數跌逾1%收市，標指重返4000水平之下。美股近日回落，當然係同息率回升有關，而息率回升係由於通脹降幅不及預期，息率高企下，股票回報自然無咁吸引。通脹遲遲未能加快回落，主要係油價跟資源價格回升，美國1月PCE按年升5.4%，高於前一個月嘅5.3%，通脹唔單止未見加速回落，反而回升，除咗係資源價格回升之下，薪金增幅保持強勁，個人消費開支亦錄得環比增長1.8%，反映喺高通脹之下，個人消費意欲未受影響。

個人消費未受影響，反映美國經濟情況唔算差，本來擔心美國經濟陷入衰退機率下降。不過咁嘅情況下，聯儲局最在意嘅通脹自然無法加速回落，目前10年債息回升至3.93%，美匯指數亦重上105，資金相對變得保守，而上周五反映市場恐慌情緒嘅VIX見23，仍較12月高位25.8高，而虛擬貨幣亦未見大幅回落，市場熱錢未見大舉撤退，暫時美股可視為回調，大跌機會唔大。

至於中港股市喺人民幣走弱下，調整之勢持續，本來市場喺去年底以為阿爺會大開水喉，刺激經濟，可惜事興願違，即使內地已開關復常，經濟回復速度未有預期中快。喺去年Q4股市上升，炒作復甦預期不果，股市喺2月份回調亦合理，尤期係踏入今年，流入市場資金未見增加，自然就失去上升動力。

踏入2月調整開始，上周開始見有唔少重磅企業公布業績，好似百度(09888)跟阿里(09988)雖然交出一份優於預期業績，但股價先高後低，反映喺缺乏資金支持下，股價高開後未能企穩亦屬正常。暫時中港兩地股市最大問題仍然係缺水，未見新資金流入，大市由1月高位回調重返250日線水平進行調整亦合理，若然大市回調至250日線水平，進一步下試19600水平，即由10月低位展開升浪至1月高位嘅回調黃金比0.382料有支持，只要大市能守住19400-19600水平，並於呢兩三日內重新企穩250日線，即20000水平，大市都可以話係成功由去年熊市走出困局，但熊入牛仍要頗長時間進行收集，今年若然大市係處於牛一期內，要有心理準備都喺大型區間上落，唔會一帆風順可以坐住貨安人咁贏錢，要提高勝算，高沽低買係唯一策略。至於幾時係低買，現水平入場買貨有一定防守性，待回升至22000至23000水平，可能又係要食糊嘅時候。