麥振江專訪丨拒搵袁志偉薦主播女兒入TVB 爆「中東呼吸綜合症」食螺絲事件：我以為電視壞咗
2023-02-24 11:00 
在電影《毒舌大狀》「原審法官」的麥振江，在1979年被選中擔任《警訊》主持，一做便做了15年，多年來被觀眾定型為「麥警司」，但其實他並非警務人員出身，反而在1974年曾報讀TVB藝訓班，同期同學有周潤發、盧海鵬、鄧英敏、羅冠蘭，以及已故的林嶺東和吳孟達等，不過最後竟然因一件事而未畢業，他的演藝生涯亦從此被改寫！
早前麥振江接受《星島頭條》訪問，他娓娓道來當年投考訓練班經過：「73年嗰陣我戇居居仲係讀緊中六，見到無綫有電視訓練班，嗰陣我考慮咗好多日，主要係因為嗰陣我住喺柴灣啲屋邨，如果嗰陣TVB畀我考到，咁就慘喇，山長水遠，嗰陣時要喺柴灣搭車去北角碼頭，再過海去到碼頭，再坐7B巴士去到橫頭磡，即係而家嘅樂富，然之後仲要行上去廣播道，後來發覺真係好遠，點知又畀我考到。」
麥振江指面試期間又發生一件趣事：「嗰陣喺無綫廣播道大堂報名，突然間陳有后行過嚟望住我，問我嚟做乜嘢，我咪話我係嚟考試，之後佢仲問我做乜嘢要去考試？跟住佢行近啲望咗我一眼就話冇嘢。我本身係唔識佢，完全唔知發生乜嘢事，直到我考咗入去訓練班直接問后叔，問番佢記唔記得呢件事，佢就話認錯我係潘志文。」
不過最後麥振江都沒有順利畢業：「我讀咗兩個月左右，患咗『氣胸』，即係而家講嘅『爆肺』，入咗醫院住咗個幾兩個月，返去TVB就話程序係跟唔番個進度，叫我第四期訓練班再來。咁我咪去讀番form 7，最後畢咗業，見到浸會大學有傳理系，咪決定邊讀書邊考訓練班。」最後因為功課太忙而打消了讀訓練班的念頭：「讀傳理系嘅同學有阿旦鄭丹瑞、袁志偉同葉家寶，因為嗰陣讀學分，可能要隔好耐先上第二堂，阿旦佢嗰陣喺商台，袁志偉就喺新聞部，我見到麗的電視開訓練班，咁近咪走去試吓，點知又畀我搵到，於是咪當part time咁玩吓，輾轉都有返去TVB拍劇，同石修仲有合作！」
直到1976年，當時政府新聞處想搵一個人做清潔沙灘嘅宣傳活動，麥振江從眾多的面試者中脫穎而出，除了做清潔沙灘和表演之外，還有做個叫「歡樂篷車」的司儀，這架「歡樂蓬車」基本上是一個由貨車改裝成的流動舞台，將車頂及四邊摺叠好，成為一個14呎的表演台；車上有一具八千瓦特的手提發電機，一方面供應電流予音响器材外，同時亦有足夠電力供夜間表演的燈光系統所需，蓬車只需闊九呎之通道，所以可以駛入大部份公園、遊樂場，以及徙置屋邨、新區等作宣傳及表演：「當時一個月有16晚要做騷，我就喺台上做主持，有粵劇、舞台劇、電台廣播劇等，夾番個主題做啲宣傳，好似沙灘清潔、道路安全、警察招募、撲滅罪行資訊等等！」之後因為他掌握不少警察資訊，湊巧《警訊》需要一個節目主持而被邀試鏡，成功試鏡後，一做就做咗15年主持工作。」有段時間麥振江一星期做足7日，休息的時間都欠缺，他笑說：「我都有諗過如果當日做演員，唔知發展係點，亦都唔知做乜嘢節目，所以諗番都覺得幾好玩。」
當年在港台工作屬公務員的身份，直到退休後退下做主持的火線，好好享受退休生活，麥振江近年最廣為人知，必定是他的寶貝女麥詩敏在無綫新聞部任女主播，因外貌端好再加上笑容甜美，成為不少人追捧的女神，麥振江被問到女兒是否受他影響而成為主播，他說：「其實佢唔係睇咗我好多，佢細個嗰陣，冇耐我都已經唔係成日出鏡，不過我都有同佢講吓當年嘅經歷，我都有鼓勵佢，嗰陣佢喺科大畢業之後，喺跨國企業做嘢，主力係接待嚟香港交流嘅員工，做做吓係覺得有啲悶，我咪問佢夠唔夠膽好似爸爸以前一樣出鏡，做主持嘅工作。嗰陣我冇搵袁志偉介紹，我成日覺得始終介紹一個人，如果呢個人真係唔得，無謂要勉強人哋畀呢個機會，對邊方面都係唔好，咁啱嗰陣有主播招募，所以我叫個女試吓，之後又成功咗，點知做咗唔夠一個月，整咗單『中東綜合症』出嚟。」
麥詩敏當時將「中東呼吸綜合症」讀成「中東呼吸中級綜合呼吸中東呼中級呼吸中東呼吸綜合症」，結果被網民瘋傳成為熱話。麥振江笑說：「其實咪好似演員對白NG，讀錯咪停一停、跟住先再讀番啱，一救就死，嗰晚我睇嘅時候，以為係電視機壞咗，訊號出現問題，雖然公司冇人話佢，但係佢係有少少唔開心，點解會咁失敗，最慘估唔到深夜仲有人睇，仲整咗段片出嚟。我之後都有同佢講，呢個係一個好好嘅教材，令你學識咗要點樣應變，初初亦都要諗到要點樣停，學習吓人哋錯咗係點樣做，而唔係不斷救，結果咪成為笑話。」
對於女兒目前的表現，麥振江直言仍有很大進步空間：「不過我唔話佢喇，費事佢唔開心，佢係可以做得更加好，仲需要一啲時間，我以前都有搵佢拍《警訊》，主要係等佢了解吓拍攝嘅嘢，睇吓喺呢方面有冇興趣，出嚟嘅效果係接受到，慢慢睇吓佢仲會有乜嘢變化。」退下火線的麥振江，至今依然留意社會動態：「我仲有參與《藝進同學會》嘅工作，今年係35周年，睇吓會唔會有啲嘢搞，大家齊齊坐低見吓面，去吓啲探訪活動！」
攝影：羅安強
場地提供：Harlan's (The ONE)
【其他文章】：
黎耀祥老婆激罕短褲look晒白滑美腿有肌肉線條fit爆 唔使開工最愛行超市買餸
菊梓喬炸傷耳返港新相鼻樑忽然筆直？再「進化」嚇親網民：完全認唔出
「寵妻狂」陳豪送陳茵媺逾200萬Hermès袋 曾送炒價30萬限量版情人節再送大橙盒：My Forever Valentine
《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料：https://bit.ly/3IMunqd
你的獨家報料一旦被採用及報導，將獲得乙份獎品。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應