獨家丨尹光醒你聚財方法利是塞爆保險箱環星多搞作楊立門莫旭秋輪住開Show

2023-02-07 07:00

環星娛樂老闆張國林及「一哥」尹光率歌手楊立門、方俊、莫旭秋、方伊琪、瑪姬、吳江倫、李龍基及一眾粵劇人等「撈起」及切燒豬賀年。尹光坦言去年豬籠入水，趁年尾開關，急不及待赴美國開Show，唱足4場，成功追返呢幾年疫情下的損失；另張國林及方俊就表示，若張偉文狀態好，今年會繼續開騷讓他有精神寄託。採訪：方騫平攝影：譚志光

張國林及尹光率楊立門、方俊、莫旭秋、李龍基等齊齊「撈起」。

今年環星娛樂有唔少搞作，打頭陣有楊立門於文化中心開個唱，之後到莫旭秋，而尹光就於5月及7月分別舉行時代曲及粵曲演唱會，另外仲有葉振棠補場，至於會否再為狀態時好時壞嘅張偉文搞騷？張國林話先入紙申場場地，再按偉文狀態去決定，情況許可一定開。張偉文經理人方俊相信，演唱會係張偉文𠵱家最大精神寄託，佢班忠粉對偉文表現亦收貨。

環星娛樂新一年多搞作，歌手們排住出騷。

光哥今年分別舉行時代曲及粵曲演唱會。

張偉文狀態好，今年會繼續開騷，讓他有精神寄託。

尹光拒認隱型富豪

提到去年尾美國登台之旅，尹光表示當地天氣太凍病倒了，雖然辛苦到不得了，但卻大豐收：「觀眾席得350人，但我收咗300封利是，其中老闆嘅大利是有600蚊美金。」光哥仲醒大家聚財方法，就係將多年來的利是儲蓄起嚟積穀防饑：「我喺2006年加入環星娛樂，打後收嘅利是統統留為紀念，最大嗰啲有10,000港元，累積咗17年嘅利是幾乎塞爆咗個保險箱。」問到可有數十萬？他笑說：「我未得閒數呀，又唔等用咪留返老咗時，冇錢拆嚟用囉。」莫旭秋就反對光哥做法：「銀紙會貶值，我覺得要有咁多使咁多，否則對唔住自己。」光哥又否認自己係隱型富豪，並交波畀基哥(李龍基)：「最有錢係基佬，佢唱咗酒廊咁多年，不過，我唱到就唱，永不言休。」稍後他跟瑪姬會合作rap新歌。