星8卦｜「樹嫂」扮大肚撬牆腳成功 亂投資榨乾「樹仔」要卑躬屈膝搲撈
2023-01-27 17:30 
熟悉「樹嫂」嘅人成日話，如果唔係前世拯救咗地球10次以上，都唔會遇到「樹仔」咁好嘅老公。
「樹仔」份人好專一，讀書嗰陣大把鬼妹媾，佢都揀番中國同學，因為同聲同氣。
「樹仔」事業都算順利，歌影視瓣瓣都撈得掂，初期戲癮大成日幻想做影帝，老實佢嘅演技又真係比較普通，但咁樣就遇到「格格」，好快共墮愛河，尤其知道格格係初戀，兩個人好鬼認真拍拖。
不過無男人唔受誘惑，「樹仔」公司要搵人幫佢改頭換面，咁啱「樹嫂」係其中一個面試者，後生靚女，性格時冷時熱令「樹仔」覺得好好玩。「格格」好快知道唔對路，發起班朋友一齊杯葛「樹嫂」型爆，反而激嬲「樹仔」話「格格」小氣，兩個人嘈鑊勁決定分手。
「樹嫂」見時機到，又食住「樹仔」負責任的性格，話咁快搞大個肚，生完就退出幕前，學人做生意。問題佢只識買貴嘢，做埋啲投資好唔實際，身邊仲出現一啲想搵佢笨嘅人，次次都話商機無限，鋪鋪都唔見七位數。
「樹仔」好尊重老婆，欣賞佢轉行決心，甘願做提款機，而「樹嫂」嘅另類投資又啱屎忽鬼「樹仔」心水，唔怪得可以做夫妻。但連續扔錢落海，「樹仔」終於頂唔順叫老婆唔好做生意，開始買磚頭，點知愈買愈大，搞到唔係好識計數嘅「樹仔」銀行戶口所剩無幾。
「樹仔」即刻諗方法搵錢，乜都做，連平時睇唔起嘅人同工作都卑躬屈膝，對一向性格高傲「樹仔」都係一種折磨，一度情緒抑鬱。
【相關文章】：
星8卦｜模範夫妻爆離婚！小雲出軌發姣派帽 吉仔用成副身家箍煲
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應