獨家丨林敏驄 江美儀 羅毓儀祝人人有得撈 《下流》成大贏家「車家」食開年飯慶功

今年TVB台慶獎項塵埃落定，「視帝」、「視后」落喺陳山聰及江美儀手上。首拍劇集的林敏驄(大師)，亦被網民封為「民選視帝」贏盡口碑。新正頭「車總」林敏驄率「車太」江美儀及細女「蔓蔓」羅毓儀豪食開年飯慶功，男方接受《頭條日報》訪問時就笑言一早攞咗「獎金」(優厚酬勞)，更抵死自爆酬勞較易角前的姜皓文還要多。採訪：方騫平 攝影：譚志光 場地：中華小館

江美儀、林敏驄、羅毓儀齊齊「撈粗」，期望新一年搵多啲。

新一年大家都要開心到爆。

「車總」及「車太」今年會畀大利是「車蔓蔓」。

去年TVB劇集《下流上車族》叫好叫座，成為台慶頒獎禮大贏家，更以大熱姿態擸埋「最佳劇集」大獎。林敏驄、江美儀及羅毓儀於開年飯局中勁好胃口，開心大啖食「鳳凰展翅」(炸小黃魚)、「年年有餘」(鎮南非鮑魚) 、「包你撈起」(豬筋撈粗麵)及冰鎮咕嚕肉等，笑言大女「芊芊」郭柏妍要開工，要食埋佢嗰份。「撈起」時3人大講吉利說話，林敏驄邊落鮑魚汁邊說：「呢個係Easy執！」江美儀及羅毓儀你一句我一句開心說：「個個有得撈，仲要係撈粗，(落花椒油)有好多油水，搵千千萬萬億億然後上車喇…。」

林敏驄率美儀、羅毓儀食美味豐富開年飯，喺新一年一定要豐衣足食。

要撈到風生水起。

26歲童顏羅毓儀愈嚟愈紅，最近更成為星夢娛樂歌手。

「車太」江美儀爆跟「車總」林敏驄八字好夾，兩人能互相助攻。

林敏驄取笑細女「蔓蔓」羅毓儀行緊狗屎運，半年間人氣急升仲唱埋歌。

美儀同前夫互相關心

江美儀等咗31年終奪視后，老友梁洛施、前夫吳君祥分別發短訊祝賀，美儀承認跟前夫仍保持良好關係，會互相關心，問到有否復合機會？美儀即笑住落閘：「唔好喇啩！畀啲真嘢我嗒吓好唔好？」羅毓儀話「媽咪」行緊正官運，有獎有事業就有老公。江美儀坦言有個伴都好，開心就得，一切隨緣：「不過，我同林敏驄八字係好相似，會互相助攻！」林敏驄表示同意：「佢開工第2日拍感情戲就助攻我，所以要投桃報李，𠵱家佢由『助攻王』變『烏雞視后』。」

前夫吳君祥透過微博恭喜江美儀得獎，美儀忙到冇即時發現。

梁洛施在IG上載繞實出爐視后江美儀的合照

最想《下流》拍電影版
林敏驄邊食邊爆料：「所以我當日同佢(美儀)講，話『視后一定係你』，但佢唔信！」問到大師係咪早已收到風？他哈哈大笑推說：「因為有人報夢畀我知。」大師再得戚搞爛gag取笑江美儀：「佢拍劇前又緊張，頒獎禮前仲騰雞到去藥房買視后(事後)丸，話對手好勁，食偉哥㗎，要頂住！」大師又再爆多啲：「今次係老竇賺錢老婆同女享福，我係總經理(曾志偉)輩負責派獎，幫佢哋打江山，哈…我連民選視帝都唔要喇，因為攞咗個終極大獎，喺台上俾團隊圍住經已好滿足，連監製都要彈埋一邊。」他又指自己已攞咗『獎金』：「『獎金』唔係差電影好多，志偉仲話我比黑仔(姜皓文)多，我睇錢份上啫。」美儀和應說：「佢攞晒啲『獎金』，所以視『獎品』如浮雲，『獎品』係好虛啫。」

林敏驄及「烏雞視后」主演嘅《下流》獲「最佳劇集」大獎，大師台上致詞時一臉滿足。

《下流上車族》叫好叫座，成為台慶頒獎禮大贏家。

而羅毓儀最想由「爹哋」執導拍《下流》電影版《如珠如寶千千萬萬》，美儀建議叫《車家大戰哈比族》都唔錯。另外，林敏驄將於3月舉行作品展演唱會，「車家」到時會於台上合體一齊唱歌。

林敏驄、江美儀、郭柏妍、羅毓儀合作愉快，美儀大讚兩女好乖，承諾會畀佢哋大利是。

當晚宣佈視帝得主時，候選人林敏驄竟坐喺台下嘉賓席，原來係有玄機。

大師今年再搞作品展，而喺2017年嘅演唱會中曾邀請苟芸慧做嘉賓。

羅毓儀憑住一臉童顏成為TVB「御用學生妹」，有好多男粉絲。

男友Mike被指跟林敏驄撞樣，羅毓儀死都話兩人唔似樣。

奪得「飛躍進步女藝員」嘅「芊芊」郭柏妍唔止有演戲潛質仲係學霸，高挑身材都唔差。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ