古天后日誌｜港股雖創半年高但入場資金未見增加配合

1月11日，多雲，有幾陣雨，嚟緊天氣變化相當反覆，呢個周末回暖，都下周初又氣溫急降，大家要小心留意天氣變化。美股繼續日升日跌，美股隔晚早段反覆，但至尾市三大指數全面上升，而標指守住3800後，隔晚標指已重返3900水平。唔少大行之前對美股睇法極為悲觀，但從近日嘅經濟數據分析，美國今年經濟陷入衰退機會唔大，可能只係步入低增長期。世銀下調2023年全球經濟增長，由去年6月估計有3%增速，降至最新嘅1.7%，而美國則由2.2%下調至只有0.5%，歐洲降為零增長，而新興市場將有3.4%，中國將有4.3%增速。從呢堆數字睇到，點解近日股市出現東升西降，新興市場表現好過美股。

世銀將歐洲經濟增長預測調低至零係有其道理，歐洲面對問題暫時難以解決，但近日歐洲股市表現唔差，主要係歐債無咗吸引力，資金自然流去更大回報嘅歐股，近日歐股已重返2022年高位。由於歐洲股市轉活，歐債債市亦開始回暖，歐企透過發債增強財務能力，踏入2023年短短10日，歐債發行規模已達1500億美元，應該有助歐企捱過目前極差嘅經濟難關。而油價回落，持續喺75美元附近徘徊，只要油價持續向下，除咗有效控制全球通脹之外，歐洲經濟應可漸鬆一口氣，慢慢復原。

雖然美國經濟增長放緩，但FOMC未有鬆懈，大部份官員都支持息口要維持5%一段時間，甚至有部份官員認為息口要推升至6%，息口先有機會見頂。美股跌入業績期，嚟緊要睇實美企業績喺過去半年高息環境下，盈利表現如何。不過市場已相信美息接近見頂，美匯指數強勢不再，資金開始流入人民幣，近日人民幣回復強勢，人民幣離岸價已較10月低位回升超過7%，資金東來下，股市出現東升西降現象。

阿爺喺年關將至，農曆新年接近之際，仍願意放水，只係相關係財政支援力度有限，A股即使近日回升，但流入資金唔多，成交增速未能跟上指數升幅，難免令人覺得A股呢一輪升勢比較虛。至於港股呢邊，近日配股多不勝數，雖然指數已升至半年高位，但企業配股抽水速度更快，而喺入場資金未見增加下，港股現水平值博率極低，尤其當配股持嬻抽乾市場資金，若然未有新資金入場，港股即使住喺高位，未有跡象大跌，都難以更上一層樓。