古天后日誌｜阿爺放水 中港股市高位徘徊

1月9日，多雲，有幾陣雨，天氣有少少回南，氣溫略為回升，開始有啲潮濕。美股上周持續日升日跌嘅狀況，周五晚因為12月時薪增幅只有4.6%，低於預期的4.8%及預期的5.0%，市場憧憬喺時薪未見再大增加後，通脹應能受控，聯儲局無需要加快加息步伐，美股三大指數上升。標指守住3800支持後，再逼近3900至4100阻力區，能否重上呢一個區域係關鍵。

雖然唔少人都擔心美國經濟將陷入衰退，但古天后都講過，只要就業市場平穩，通脹同時受控嘅話，經濟表現唔會太差。上週初公佈嘅JOLTS數據顯示，11月職位空缺仍高達1046萬份，而失業人數只有600萬左右，職位空缺跟失業人數比率仍處於1.7倍高水平。歐美經濟重啟，部份行業如酒店業重新開啟業，正急需招募大量人手，從8月至11月行業平均新增人手高達8萬人，難請人令薪酬上升較快，但12月新增聘已有所放緩至6.7萬人，整個服務業薪資環比增幅也開始回落，環比只增長0.3%。

另一方面，過去幾個月CPI回落速度之中，最唔明顯係薪酬升幅所帶來嘅潛在購買力，過去兩個月科技企業出現裁員潮，為本來緊張嘅勞工市場提供更多人手，12月薪酬升幅自然難以上升。去年美聯儲加息係因為CPI失控地上升，一旦CPI有秩序地回落，今年嘅方向再唔係加息，而是貨幣政策幾時再由緊放鬆。事實上，當12月非農數字一出，10年息由3.75%回速回落至3.55%，資金再次入場掃美股。美股暫時未擺脫日升日跌嘅情況，暫時可以吼位跌嘅時候，收集返啲優質大價股如蘋果公司，亞馬遜呢一類。雖然唔少大行話今年美國經濟會陷入衰退，但古天后則認為陷入衰退機會唔大。

至於港股，上周五晚跟住美股向上，只係中概股已無力再上，反而出殪回吐。不過周末期間，阿爺又出好消息，銀保監會主席郭樹清週末提到，要加大貨幣政策力度刺激經濟，本週將有M2及社融等經濟數據，估計會繼續放水，問題係阿爺放水，有幾多錢會流入股市，暫時A股成交未算好活躍，但A股仍處於較低水平，吸引力現水平係大過港股，畢竟港股由10月低位反彈超過三成，嚟到21000樓上，吸引力同值博率已大減。