頭條戲場丨《上流落水狗》年度大癲之作

2023-01-07 08:00

榮獲本屆康城影展最高榮譽金棕櫚獎的《上流落水狗》，絕對是年度黐線片，有錢佬呀、Fashion界鉅子呀，應該睇到好老尷，導演非仇富，其實恥笑你同我，即普通人都絕不留手。總能在日常生活中揭開人性荒謬，夭心夭肺令人失笑，有諷剌大師之稱的導演魯賓奧士倫(Ruben Östlund)又一諷刺鉅作，戲中三部曲Part Part計算準確，片長近兩個半小時，有大笑有恥笑又有苦笑，引人笑唔容易，分層次仲要有意思，娛樂性超豐富，黐鬼線導演。(上映中)撰文:廖思慧

Yaya同Carl鬧交後好快和好如初，更以KOL身份獲邀上郵輪歎世界。

做得KOL梗係乜都拍片影相放上網。

電影以不知名男模Carl(Harris Dickinson飾) casting作開首，現場毒舌記者一開口已焫著所有頂級名牌話事人及同性戀者，又指男模人工只有女模的三分一，之後輪到男模Carl同Model女友Yaya(Charlbi Dean飾)撐枱腳，男方埋單後爆Seed，「點解你搵得多過我，但次次都係我埋單？」兩人為此由餐廳鬧到上的士再嘈到返酒店，探討男女平等有排講，學大劉評呂小姐話齋，「真係講七七四十九日都講唔完」。

電影第一幕已經好搶口，只要品牌夠高級，就可以抬高頭擺架子鄙視消費者。

導演踢爆時裝界秘密，男Model人工只有女模的三分一。

Carl為咗埋單一事鬧女友鬧到唔識停，佢話唔係錢嘅問題係原則問題喎。

入場前請勿食太飽
之後輪到本人最愛的郵輪篇，口不擇言俄國肥料大亨、睇落友善的英國軍火商夫婦及剛賣晒公司超有錢的秃頭寂寞富商等出場，個個不食人間煙火，羨慕人哋有工返，喺酒吧同Yaya講多兩句覺得被重視，想派錢畀人咁滯。然後一場由失控船長（Woody Harrelson飾）主持的船長晚宴，加埋超強暴風雨，富豪出晒事，屎尿嘔吐物橫飛，船上化糞池也因船身搖晃而出現屎坑倒灌，配上重金屬音樂，迎來估唔到的權勢轉換災難。

梳短金髮的就係高級侍應Paula，好能幹，眼中只有錢，教下屬只要乜都Say Yes就有源源不盡的貼士。

肥料大亨係咁幫情婦影相。

麻煩情侶獲安排住靚房。

Carl上船後的工作就係負責幫女友影相。

Charlbi Dean去年8月因急病離世，呢套係佢嘅處女作亦係遺作，好可惜。

肥料大亨帶埋老婆同情婦上船，兩個女人表面冇唔妥對方，有錢就可以和平共處。

暴風雨晚宴，肥料大亨同船長製造咗一場極尷尬又好笑的場口。

佢就係船長，冇責任心又唔正常，忽嘅。

肥料大亨老婆叫侍應陪佢游水，仲話咩人生唔可以剩係得工作，個個都可以講，係佢唔得囉。

大亨老婆叫廚師放低啲食物陪游水，搞到啲嘢食變咗質加埋暈船浪，大亨老婆又痾又嘔真係抵死。

呢對就係友善的英國軍火商夫婦，呢幕死期到，笑死我。

最後，因為暴風雨加上海盜偷襲令郵輪沉沒，生還者包括Model情侶、肥料大亨、秃頭富商、乜都Say Yes的高級侍應Paula及菲籍洗廁所女工Abigail（Dolly De Leon飾)等沖到去荒島，有錢人俾人服侍慣完全等死Mode，識捉魚同生火嘅地位十級跳。導演在最後一Part 直擊要害，非常直白又狠狠地對所有人作出批判，簡單嚟講，即係「在座咁多位都係垃圾」。