劉鑾雄記者會！大劉足本版全筆錄形容呂麗君、李嘉欣句句有骨

2023-01-03 20:48

大劉劉鑾雄今日（3日）現身記者會分代皇室堡事件以及與呂麗君的關係，歷時一個半小時，大劉一現身便友善問記者想如何安排，隨後便由他先發言再發問。

【相關文章】：

大劉憶述當日皇室堡的真實情形：

大劉說：「首先我想由皇室大廈，我想澄清下，第一公司處理得唔好，被個男人踎係條柱，我無位過，當時過節好多人，平時屋企行路、出街少則都有1個保安畀我扶，多則有2個，我行行下會休克，呢啲係事實唔係作出嚟同自己解釋，呢條友我就細細聲叫佢，唔該你起身啦阻住人過，佢唔係答我好，係答我好攰，所以我要坐低休息，叫極佢都唔肯起身，自私自利，咁我當時過唔到，我過到得一個方法就係掂到佢身過，咁有幾個問題會出現，人一轉身一撠，撠到我，我會跌落地下，小則跌斷一兩條骨，重則後腦落地會死，我見到商場啲人大部分人有戴口罩，少部分人沒戴口罩，若果我經過掂到佢哋，萬一佢哋中招傳到畀我，我是『九死一生』。仲有一樣仲恐怖，萬一畀個阿伯認到我，唔係拎綜援住劏房的大劉又嗌非禮，個阿婆見到我唔使拎綜援住劏房又嗌非禮，或者想強姦佢，你唔好以為我講笑，喺五六年前我唔肯定咩時間，有個大陸女人帶住個囡上嚟，嚟公司話要上嚟見我，樓下保安見到唔畀佢上嚟，佢又扮走，保安唔係度就閃上嚟我26樓寫字樓，做乜嘢呀，話要帶個囡上嚟要我照顧佢喎，一世照顧佢喎，梗係唔會出嚟見佢啦，我係寫字樓辦公室入面，話我唔見佢就會叫記者來開記者招待會。後來我律師話咁樣係刑事恐嚇，又同佢講再唔走報警拉佢，咁樣係刑事恐嚇，我唔見你就開記者招待會，當你見到呢啲你驚唔驚，梗係會驚。」

大劉講「狂躁症」：

「好似我今日見報紙，報紙話我有『狂躁症』，我有啲說話要講咁多位記者寫低，狂躁症我一定無啦，創傷後遺症就好多，你知唔知咩叫創傷後遺症？即係撞車死唔去咁又好驚呀，例如呢啲話要我照顧，唔照顧又會咩嘢呀，好多好多我唔怕喺度講，有個呃倫敦金2億幾銀，唔識佢㗎，無端端送盒茶葉上嚟我公司，但當你送盒茶葉畀我我唔識你，已經有古怪，唔使一分鐘我都知咩事，我十幾年前識得個女律師，佢個男朋友又係姓蕭嘅，佢就係間律師樓做，咁個律師樓係佢打呢個電話畀我前三日，我就係間律師樓分咗身家畀我啲仔女，咁個律師睇到裡面，原來咁發㗎唔使做倫敦金，成世做倫敦金都唔夠發，日日都有人打電話嚟打我主意，呃咗2億幾銀倫敦金走甩左，警察冇佢符喎，佢都夠膽打電話嚟，話送盒茶葉畀我，又話識我媽識我妹，但我唔識佢喎，不如你話識我祖先漢高祖劉邦呀。我講出嚟唔係想人同情我，我自己都係高危人士，亦都換了腎，亦食抗排斥藥，身體抵抗力受抑制，自己打了五針，但醫生話我只有3、4成抗體，我唔係怕死，因為我最細個女得4歲、個仔得10歲、個女得14歲，我想條命長多幾年睇佢哋大，所以我好驚掂到人，有啲人仲話我有潔癖，呢啲全部係廢話。所以我當日唔敢過有幾個原因，好怕被人撠低、好怕中招、好怕被人認出又屈我畀錢呀！大把人日日上嚟我公司，敲詐我詐我型！我秘書個個都有紀錄。」

大劉講蕭若元：

「我今朝睇到蕭若元喺影片，喺佢平台講到同我好熟，食過十幾次飯，單獨都食過2、3次，我淨係見過佢一次，就係佢老闆黃玉郎係公司，一次咁多，但佢係網站講話見我十幾次，點解呀，我都同情佢可憐佢，我做呢啲網站都發達啦！佢都係想多人睇多人聽，就會多廣告，點賺錢呀我真係唔識，但我同佢唔熟。佢係叻人，但叻有咩用，呢個世界專收叻人，唔係點會搞到佢家姐間上市公司破產，佢個仔生意失敗破產，佢又爭人錢走咗去台灣，真（事）我唔怕講，如果我有講錯，任何人歡迎上嚟同我挑戰，你睇我無帶稿。」

大劉講呂麗君：

大劉開腔講到呂麗君，他直言：「我最嬲係咩，最唔想畀人見到我同呂麗君一齊！唔知大家有無睇《愛回家》？裡面有個角色叫「食屎陳師奶」，我唔理佢有冇食屎、係咪陳師奶，總之當時見到有個師奶影我相，我無嬲佢，佢啲人層次係咁我唔會嬲佢，但當我見到佢相機影到呂麗君即係呂姵霖我就嬲！因為我唔畀人見到唔想畀人誤會，或者被人造謠，話我同佢行商場復合，你哋聽唔聽得明呢個就係重點。唉，當日我嬲完就走啦，點知隔兩日便有網上打手『邊個大獲全勝全家搬返我屋企』，我唔識上網㗎，呢啲咁嘅網上造謠，唔係皇室堡開始，呢啲已經8年，8年來點解我唔出聲呢？」大劉突然問及現場資深記者，有沒有聽聞以前「福臨門塞春卷」事件，我要澄清我有嘢講，我無做過，諗都絕子絕孫，話塞春卷呀、乒乓波、網球、遲啲話我鍾意畀人塞添，把口在人地度，要屈你有幾難。（點解當時唔澄清？）我都有諗過澄清，若果100個有1個冇澄清就話真，係怕蟻多嬲死象。」大劉提到有日睇電視，被劇集影射與某人去旅行，「話我去坐飛機鬧到對方喊，仲拎支票出嚟簽個名掟落佢塊面，識我的人都知我從來不帶支票，因為我簽名核突唔怕講，但有人咁作，我唔係核突佬，識多幾個女朋友，唔係住劏房拎綜援就會有人話你，我講真㗎，以前幾多朋友喺背後講。30幾年好多嘢忍得好辛苦，有啲仲要繼續忍落去。如果你哋識蕭若元，唔該同佢講，我幫咁多貧苦人唔介意幫埋你，求求你搵食借其他人個朵，借蔡英文個朵搵食，唔好借我個名廢話，講三講四，搏咩呀，有狂躁症？我虐待過你，從來就沒有私人見面，蹹得就蹹。」

相關閱讀：劉鑾雄記者會！大劉親解與呂麗君見面：有啲人天生性格到死嗰日都唔會改

大劉又再度提到蕭若元，對方指皇室堡事件中的男子是呂麗君所指示，大劉說：「我覺得絕對唔係，我喺呢度要澄清，點解我話唔係，我喺商場行走江湖，呢個人都睇唔清，我真係要剖腹自盡，但有些人加鹽加醋，任佢哋講就得啦！」隨後現場律師再讀一次大劉早前發出的聲明，大劉表示聽畢後有好多話想講，又說：「首先，財產處理上面係陳凱韻與家人，要特別澄清，因為這句容易有誤會，係包括陳凱韻以外㗎，唔知以為係陳凱韻同細路，我想澄清意指除了陳凱韻與三個細路，仲有我嘅家人，可能包括呂小姐仔女，可能包括寶詠琴以前的仔女，費事畀人話身家係陳凱韻掠晒，絕對無咁嘅事。我最大個仔都43歲，我未有其他細路前，我係得佢呢個仔同埋佢個妹呢個囡，到後來呂麗君生、陳凱韻生，佢都係最大，除了讀書叻，做得嘢事少，個人又成熟，我最開心是他好肯做好多善事，係我最開心，呢啲係我要補充。講真要處理財產，我不怕和大家講，當時處理財產是與陳凱韻結婚兩日，律師同我講，財產在信託都唔安全，都會有機會有人拗和打官司，未安全，所以我想了2晚決定犧牲小我，全部送晒出去，我曾經同律師講，寧願畀錯人，都不想益天下極壞極壞極壞的恐怖份子，呢度我澄清一樣嘢。我想講返呢8年網上打手，我唔識上網、唔識用智能電話，但我都知是請人用網路打手，搵人吹下畀錢就得，好多人鍾意用網路歌頌自己踩人，有單嘢仲寫我同陳凱韻結婚呀，係報恩佢阿媽畀咗個腎我，我要換腎都搵個後生啲，60歲人都仲要搵個老腎去換。新聞寫就係陳凱韻阿媽換咗個腎畀我，我就要被迫同佢結婚報恩，邊個有利益衝突講呢啲嘢呀？呢8年真係忍好多嘢，有好多真係唔講得，係驚影響你哋生命安全，費事累你哋。」再次提及呂麗君，大劉說道：「今次幫呂小姐，若唔係考慮到兩個仔女一個12、一個20歲，我決定幫或者唔幫，平時決定係0.1秒，今次做決定諗咗足足兩分鐘，唔係數目大細，係應該定唔應該，係唔想有難堪的事出現影響細路，為佢仔女保留一點尊嚴。我都要保護我自己、保護陳凱韻和仔女，保護其他仔女，我睇到特首李家超在電視講一句話好認同的，就是害人之心不可有、防人之心不可無，我聽到拍手掌，希望記招之後有人收斂啲，啲網路打手大家都不好信，如果你地有懷疑，不如速速打畀我！其實好Sad，我見過好多人，有啲天生性格到死嗰日都唔會改，我能夠做咩，我只是普通人，只有默默地黯然接受。」

大劉提呂麗君的困難：

隨後大劉表示若非得已都不想開記者會，著記者有甚麼都可以問，想到便會講，問到呂麗君有何困難？大劉拒絕透露：「我都知道你哋會問，但我真係唔想講，我本人做事是今日留一線、他朝好相見，唔會趕盡殺絕任何人，唔止呂小姐。有留意財經金融地產的人好快會知，我就唔方便講，如果唔係為咗仔女，我都極度唔想幫。」關於蕭若元講任何說話，問會否要求收回及採取法律行動？大劉表示：「我絕對唔會，第一他在台灣，我都識台灣朋友，但若每事我都採取法律行動，變相是益了他，我諗都不會諗。我今日慶幸都搵到稀粥食，我不影響到後代，有些人好慘為了搵食，好多人要賣身，我慶幸自己勤勤力力，借外母15萬唔敢講搵到好多，搵到餐安樂茶飯食，但若果他繼續講，我會繼續講，打擊佢令他無任何信用。但我不會專登去做，大家相識一場，我亦好諒解他，如果我都要在平台呃like就大鑊啦。」

問若呂麗君他日再有求會否拒絕？以及會否擔心事件令大劉難以見到仔女？他表示開記者會已預計所有事，「兵來將擋、水來土淹，人哋有選擇做什麼，我好慘我沒有選擇。」問到與呂麗君的仔女有沒有見面聯絡？劉鑾雄沈默一會說：「8年前發生的事不方便講，當時見得好密，8年前發生一件事。」大劉再沈默一會續說：「件事牽涉到錢，因為錢露出她的九尾狐真身，用了好多法律方法解決所有事，自此之後，她就好少好少比仔女我見，係8年前某一件事後，現在我肯去幫某些人後就見多咗，但見得多時都要小心保護自己，有次我同個女去行街買衫，她阿媽（指呂麗君）就說要個女鍾意我出來陪她揀，我話不用，怕SALES見到又以為復合，結果當然不肯出來，又話不如叫名店拎衫去家裡揀，裡面有伏，我叫秘書對她講，她又不是不認識名店可以自己叫，到時又話劉生打嚟，又話復合，這些我都好避忌。我會好小心，盡我能力去照顧兩個細路，但照顧都要步步為營。」講到呂麗君時兩度企起身，問大劉是否也是機會講起事件？他說：「屈起來都不止8年，最大件事是10年前，但唔講得會影響到你哋，有些女朋友是娛樂圈便多是非，便很多加鹽加醋，我早幾個星期才和老婆陳凱韻講，我要努力作戰到壽終正寢為止。」有記者問及早年的電話錄音傳出會否有影響？大劉說：「你認為有冇影響呢？一定有，但係（以）我咃功力，咁樣影響到我，不如去剖腹自盡。」問呂麗君在大劉心中是怎樣的人，他說:「我真是不方便評論佢，講七七四十九日都講不完，要紮營大家喺度講。陳小姐有沒有不開心及嬲？她點值得，她知咩事，皇室堡件事她都在香港，隔幾日就去日本，仲叫埋我去，但我多嘢做好攰，想屋企瞓多幾日覺沒去。（呂小姐好有機心？）你形容得好膚淺，機心太膚淺，深入會喺咩你自己研究下，呂小姐在某方面好叻但搵唔到食，嗡得就嗡。某些方面我同老婆講，佢好蠢唔係扮，佢都不信，但現在信了，總之她（呂麗君）在我面前詐傻扮懵，真傻真懵又有乜用，在某人面前無信用，講咩都無人聽。如果大家知我講一套做一套，都唔會聽我支笛。我都被人呃㗎，若銀碼計你哋都不敢想像。呢個問題（有機心）問得好，但不適用在某些人身上，有些人是ET外星人、個心無心跳，好似《畫皮》唔係人嚟。」

大劉講前女友：

傳言大劉很照顧前女友？他表示唔識答：「有啲真係助養，但不是全部，值得的話就會做，我2、3年前匯了筆錢，是天文數字畀53年前的女友，你都想像到佢有幾老，呢啲咪值得照顧，唔係全部前女友都照顧。有啲無良心，有人賤到無倫，我知娛樂圈都不少。之前有女友，兩姊妹夾埋冒我簽名去申請油卡，唔好彩比我會計發現，如果報警咪死梗，但我無報警，你哋太老咁都得。」而大劉又主動提名下尖沙咀商場The ONE，稱「The ONE」是兒子劉鳴偉所改，大劉更表示：「我本人任何思想環境下、私人和工作上都無諗過一個字叫『The ONE』，當有人想搵老襯，成個廣告版放上來叫我秘書登廣告，我都會幫做。」蕭若元指商場名義指其一生中至愛？大劉即「釗」了一聲，並說：「我英文好水皮，個稿係人咃交嚟，叫我秘書去呃個老襯，可以講七七四十九日！」對於傳聞太深入民心，有記者建議大劉開個頻道去澄清，他表示：「唔係（點擊）過百，係過億呀！我真係想開個頻道，屋企人話唔好，會好容易被人駭入去、被駭講黃絲、講反中亂港；我真係想講我見到火滾的事，但一陣被駭入去，話我講想邊個落台，咁我就仆X。」大劉又表示：「萬幾蚊電油都殺，乜人都有啦，仲有啲呀，結咗婚兩三年呀，一年都同我攞幾個鱷魚皮、鑽石手袋啦，又話我送個手袋出嚟執返劑，涼茶就可能有！如果我肯執，可能排到黑龍江呀，我依家行路都行唔到，地下有張銀紙都執唔到呀。」

大劉講李嘉欣：

大劉表示怨屈氣忍了30年，「劉生今次唔係豁出去，雖然唔會舒服啲，但只係想澄清，唔想畀人造謠是非，包括女人好、蕭才子（蕭若元）好，話我狂躁症、話我最愛係李嘉欣、又The ONE，唉！（考慮商場改名？）梗係唔會啦，我個仔改㗎，我做嘢好笑㗎，我買皇室大廈都無改，我使改？乜嘢都有人作，因為啲人唔抵得我，搵少少又多幾個女朋友，我要抹黑你呀，任你講㗎喎，個口擺人哋度，我平時去街有晒行事曆，秘書、佢家姐（陳凱韻）都知！我大膽講呀，娛樂圈鬼同魔就多！神就無啦，除咗歌神有個陳奕迅。我做人都有道德底線，嗰個人成功咗啦，我替佢開心呀，唔係咁易搵。」問到有否緋聞女友是值得一讚？大劉稱：「唔係娛樂圈有好多，但娛樂圈？I Am Sorry，無，係絕對絕對無！即係同我有緋聞嗰啲。」

【點擊逐句重溫睇大劉記者會「十大金句」如何句句有骨講到好勞氣】：