獨家丨陳煒開到口想攞視后同天上父親分享醫生老公力撐拉埋病人投票

2022-12-29 07:00

陳煒(煒哥) 憑TVB重頭劇《回歸》鄧麗娟一角殺入《萬千星輝頒獎典禮2022》「最佳女主角」最後十強，以「親生女」姿態成為視后大熱，跟「影后」鮑起靜及好戲之人江美儀拗手瓜。強敵當前，煒哥未驚過，自爆有好老公幫拖，搵埋診所姑娘及相熟病人瘋狂投票，實行撐硬老婆，後援會溫馨又強大，煒哥未企上頒獎台已甜到入心。採訪：方騫平攝影：譚志光髮型：Chris Cheng @ ILCOLPO 服裝提供：MARELLA 場地提供：Amelia Hong Kong@Harbour City

煒哥開到口好想攞視后，希望有實際嘅獎項。

入行25周年的煒哥今年經歷了大起大跌的一年。

她認為《回歸》入面鄧麗娟個角色令人好感動。

煒哥唔會分析視后走勢。

煒哥自言已盡力做宣傳拉票，希望喚醒觀眾的記憶。

入行25周年的煒哥經歷了大起大跌的一年，第6度爭視后的她，除攞埋TVB 10年「老人牌」，更覓得如意郎君陳國強醫生，唯一美中不足是婚禮前夕爸爸離世，令她添上傷感。

煒哥拍《回歸》期間丁父憂，她希望得到視后，跟天上爸爸分享成果。

煒哥老公陳醫生係佢忠粉，不斷幫老婆拉票。

家有白事堅持開工

煒哥坦言都想在入行25周年的特別日子得到肯定，「《回歸》入面鄧麗娟個角色令人好感動，都有好多人談論，只係時間性上較輸蝕，始終都係7月播出嘅劇集。」問到「親生女」身份爭視后係咪有優勢？煒哥笑說：「如果係咁分都可以咁講嘅，我效力TVB 10年，累積咗唔少觀眾支持，希望可以加分啦。」她又乘機為自己拉票，專業精神值得加分：「最難忘拍《回歸》期間爸爸病逝，但唔想影響大隊拍攝進度，要收拾心情開工，好彩一班演員都體諒我心情低落，會畀空間我。」

郭晉安及陳煒主演的TVB重頭劇《回歸》，7月播出時叫好叫座。

最難忘拍《回歸》期間爸爸病逝。

煒哥家有白事仍堅持開工。

鮑姐演技屬世界級

叫煒哥分析視后走勢？煒哥笑說：「鮑姐屬世界級演技，佢唔使獎個個都讚好…而美儀都好勁，我分析唔到呀，始終我哋由亞視出身，都係有經驗演員，今次我哋3人演嘅戲種同角色都有好大分別，好睇大家口味，所以都係交畀觀眾決定。」她自言已盡力做宣傳拉票，希望喚醒觀眾的記憶，既然做好本份就唔好諗咁多，但信心依然會有。

49歲的煒哥，身材可以力敵後生女。

做「影後」都不錯。

煒哥喺泰國補渡蜜月期間，不忘着泳裝拉票。

江美儀及鮑起靜喺熱播劇《下流上車族》中大比拼，兩人演技不分高下。

煒哥及江美儀兩個「亞視幫」夾擊TVB「姐仔」陳瀅及劉佩玥。

承諾唔會「上岸」

煒哥坦言自己最輸蝕在港親友唔多，好彩有Fans撐住：「老公都好好呀，佢自動自覺叫晒啲姑娘及相熟病人投我票，係咁幫我拉票。」她又指老公係佢忠粉：「佢好鍾意睇我啲戲，仲會不時話『老婆最好，冇得輸！』咁佢都算ok旺我嘅，我哋互旺啦。(咁咪夠晒喇！)未夠喎，我希望有實際嘅獎項，唔會辜負Fans期望，做人有要求先會有進步，有獎會更加落力。」煒哥形容呢10年發生咗好多事情，成個人都唔同咗，希望能有個圓滿結局。「升呢」醫生太太嘅煒哥仲承諾唔會「上岸」，未來她只會更進一步，喺演技上昇華到另一層次。