獨家丨鄭俊弘跟何雁詩計劃追多個B 演沉重戲遠離囝囝怕受影響

2022-12-23 08:00

《法證先鋒》系列已播到《法證V》，而鄭俊弘（Fred）成為當中參與最多輯演員，亦是他感到最難演一次，幸好遇着首次合作、好識保護對手的黃宗澤。榮升爸爸半年的Fred，演沉重戲要遠離囝囝Asher，以免被其高甜度笑容影響工作情緒，他又讚Asher超乖超好湊，已計劃跟太太何雁詩追多個BB。採訪：杜杜攝影：羅安強

39歲的Fred做了爸爸後感到責任大了，人亦變得成熟。

《法證V》中「湛霆」雖然承接上輯，但開朗卻經歷轉變，走向自毁之路， Fred承認演時有難度，「去到結束自己生命感覺好deep，我都同監製傾要搵到個有力point先得，唔係說服唔到去做。」幸好遇着雖然初次合作，但拍攝時很照顧拍檔的好對手黃宗澤，「有個好感動、好舒服嘅位，我要培養情緒代入角色，佢就叫大家『演員準備緊大家唔好嘈』，佢會保護我，好窩心。」

Fred在《法證V》中演的「湛霆」，是承接上輯的角色。

擔心俾前世情人冧死

6月初嘗當爸滋味的Fred，坦認愛錫囝囝程度已達癡戀，但太幸福亦不容易投入沉重情緒演戲，「要同自己分得好開，要好專注喺個角色嗰個環境度，如果再諗個仔就唔得。」由幻想到真正做爸爸，他認為開心指數不斷飆升，「幻想做爸爸會有好多擔憂，乜都要緊張佢、睇實佢，但係忽略咗個小生命係自己個仔嘅快樂，嗰個快樂係將之前想像中嘅擔憂蓋過晒，唔單止畀我同太太歡樂同開心，令全家人都好close，無論我媽咪、家姐、外父、外母都多咗聚埋一齊食飯同我阿仔玩。」

Fred讚Asher是個開心寶寶，一起身就笑，少喊少扭計。

Fred每日都會唱歌給Asher聽，希望音樂可以伴隨他成長。

Fred提到Asher就笑得勁冧，慈父樣出晒嚟。

Fred感恩Asher的出現，令全個家庭都變得更親密。

Fred和何雁詩雖然冇請工人，全程親自湊B，但兩人應付自如，加上有最強長輩作後盾，「我媽咪過親嚟就話『我幫佢沖涼、餵奶、換衫』，大家搶住做。」所以問會否送禮答謝太太，他就搞笑話：「再生多個囉！哈哈！冇咩特別獎勵，但我哋三個嘅關係愈嚟愈親密，係家人嘅愛。」Fred承認同太太確有追多個BB計劃，但要遲一步，仲話想追個前世情人，不過仍有顧慮，「想像到阿仔都錫到咁樣喎，如果阿女我真係死得囉！」