楊千嬅演唱會｜再度淚灑舞台唱到除鞋 真心想唱歌懶理輿論：嗰啲唔係重點
2022-12-19 09:00 
楊千嬅一連兩場的《楊千嬅B minor音樂會2022》昨晚假亞博舉行尾場，其圈中好友方力申、唐文龍、郭偉亮和太太葉佩雯、吳若希和老公、馮曦妤與老公等，曾與千嬅在《多功能老婆》合作的陳煒、黃浩然及朱晨麗也有到場，而陳煒更帶埋老公前來，至於千嬅父母、奶奶，老公丁子高及兒子Torres亦有到場。
【點擊睇台下撐場好友】：
演唱會一開始時，場內即呈現一片紫色燈海，千嬅唱完第一環節後已表示不捨，並指雖然今次只得兩場，但她認為份量已超越了以往的演唱會，她指可能是領悟後再上舞台的感覺，而fans亦不停大叫：「千嬅，我愛你！」、「千嬅，加油！」千嬅指觀眾掌聲對她來說很有份量，又坦言因不知下次幾時再開騷，所以會拚命去做，更自嘲自己已「過期」，但仍期望她的音樂可以無限期陪伴大家。之後千嬅又在台上感激《多功能老婆》拉隊來捧場，而台下的陳煒及朱晨麗即時舉手比心心。
唱《野孩子》前，千嬅感觸地指走到現在比想像中難，而fans亦大叫「撐你！」來打氣，千嬅說：「今次舞台好近亦好遠，能夠行到呢度唔容易，要多謝觀眾同身後團隊，雖然遇到阻礙，但佢哋仍然保持初心，到唔同城市傳承廣東歌⋯⋯好可惜一路冇機會返嚟。」一向心口有個「勇」的她更說：「勇字唔只掛在口心，而係人生上。」千嬅又激動地表示今次演唱會是她的選擇，故會以最大勇氣來面對結果，並指在艱難日子可以做開心的事，已經是過著好日子，之後千嬅提到當看到身邊愛惜自己的朋友、家人，尤其是爸爸很擔心自己的時候，亦終忍不住落淚說：「佢哋見到我好硬淨成碌木咁企喺個台冇乜嘢，佢哋擔心又唔敢問，但feel到佢哋擔心，所以我想話俾大家聽，我會努力繼續做好自己，多謝你哋，今日每一個入嚟嘅朋友嚟睇我個show，同埋你哋嘅掌聲特別有意義、特別唔同，兩場但記一世！」唱完《木偶奇遇記》後，千嬅指想珍惜每一分每一秒所以不會喊，又謂Love和Hate可以畫上等號：「人生有喜有悲，亦有好有壞」而她也正在學習中，亦會堅持做自己的音樂來感謝大家。
到Encore部份，千嬅唱到興起突然落台與歌迷作近距離接觸，一眾歌迷隨即蜂擁上前，到唱出《姊妹》時，千嬅亦感動說：「你哋有義氣呀，冇漏低我！」完場後，因為歌迷不願離開會場兼狂叫Encore，令千嬅再度出場並笑著說：「呢啲咪真愛！」之後她又表示「頂唔順」要脫掉高踭鞋，然後赤腳在台上唱出《可惜我是水瓶座》和《一個人的童話》，並向歌迷說：「你哋就係我嘅止痛藥水，I love you！」兩度Encore後，演唱會在晚上11點57分完結。
【點擊睇台上精彩畫面】：
千嬅在完騷後透露因在大陸拍《聲生不息》而令她想開騷，又指今次有很多不同感受：「上一次開騷係2017年，一路都想返嚟開，但因為疫情取消咗，其實都唔係壞事，自己未準備好，想吸收多啲，遊歷唔同嘅舞台、節目訓練，有好多材料好想表達，想分享畀觀眾，都唔使擇日，呢個時勢想做就做。」至於可會因輿論而感到壓力？千嬅直言沒有，決定回來開騷前已調整好心態，並指自己的壓力是來自演出：「真心好想唱歌，想表演畀大家睇，嗰啲（輿論）唔係重點，壓力留番喺表演水準上意義緊要啲，就係以歌會友。」至於為何提起爸爸會那麼感觸？千嬅說：「我爸爸噚日傳咗個訊息畀我，話好開心見番我台上個樣，每個父母都擔心自己嘅仔女，嗰份難過我唔驚，我處理到，但身邊人擔心我難過就令我最難過。（爸爸擔心乜嘢？）佢驚我唔開心，擔心我有壓力，但我話你個女EQ已經係神級，基本消化能力係有，但作為父母都會擔心，養兒一百歲、長憂九十九就係咁解。」千嬅指爸爸平常不會說太多，故收到這鼓勵後，覺得能令他覺得真心開心，自己也很感動：「做仔女最緊要父母開心同健康，呢幾年體會到，除咗生死就冇咩咁介意。」干嬅指自己會用「面對」去消化網民的回應，又謂人生有好有不好才完整：「唔可以淨係擁抱愛你或撑你嘅人，同時要接納挑戰你嘅人，咁先係完整嘅人生，做一個藝人需要心態成熟，先可以互相進步，係長智慧經歷。」至於Encore時在台上除鞋，問千嬅是否想宣布有喜？她聽後即笑說：「咁唔係喜，係驚驚哋！我關節痛，噚日chok到隻腳先除鞋。」千嬅指完成手上的工作後打算休息幾個月回歸家庭，又笑言已很久沒去玩，所以好想去旅行。
【其他文章】：
陳煒性感大解放繼續晒蜜月靚相 激罕著比堅尼騷火辣身材為網民取暖
西西逝世丨名著《哀悼乳房》改編電影 楊千嬅破格只戴bra出鏡被任賢齊摸胸
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應