世界盃2022｜專家分析:心態決定法國衞冕命運
2022-12-16 09:00 
法國兩球淨勝摩洛哥殺入決賽，近乎破晒以往衞冕冠軍嘅不利數據，認真唔簡單。
「高盧雞」入嘅兩球波，睇到基利安麥巴比嘅作用不單止係邊路爆破，上半場迪奧靴南迪斯喺小禁區左邊嘅入波，同埋下半場後備入替嘅高路梅安尼後上入楔嘅入波，都係因為麥巴比將個波推向中路，並引嚟至少四個摩洛哥球員防守，令邊路球員多咗空位進攻。當然，兩球入波有少少運氣成分，但不得不讚法國嘅呢個部署。
不過，艾爾發現法國近仗出現唔少問題，今屆世界盃法國選入皇馬新星曹亞文尼，整體表現一般，尤其防守貢獻唔大，另一位中場尤索夫科芬拿表現同樣失色。至於滿場飛嘅基沙文當然值得一讚，但要由一位進攻球員不斷回防，再引球推進組織攻勢，呢個情況唔太理想。睇下拉比奧特下場能唔能夠復出，佢對球隊中場攔截非常重要。
另一個更致命嘅問題，係法國上下半場判若兩隊。法國上半場有十次射門，但下半場只得四次，而下半場嘅控球比率只有三成四。法國下半場完全唔做前場緊逼，防綫拉到好後，任由摩洛哥組織攻勢。摩洛哥下半場射門次數達九次，邊路攻勢排山倒海，唔係把握力差少少，法國未必踢得咁輕鬆。
呢隊由迪甘斯帶領嘅法國，不時出現贏緊就縮嘅情況。唔係話無時無刻都要踢得進取，但全隊縮得太後，令後防不斷受壓，絕對唔係好事。下場生死一戰，法國對住機動力同把握力好強嘅阿根廷，如果迪甘斯依然採取呢種睇定嚟食嘅踢法，隨時斷送大力神盃。 -艾爾
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應