世界盃2022｜專家分析:神奇球隊出神奇小子
2022-12-14 08:00 
每屆世界盃都會有神奇球隊奇兵突出，今屆就有殺到四強嘅摩洛哥。佢哋貫徹咗現代足球理念，以穩定後防取勝，除咗喺對加拿大嘅烏龍球以外，在法定時間內至今未失一球，而且不止於分組賽力壓比利時及克羅地亞首名出綫，淘汰賽更先後將西班牙及葡萄牙踢出局，呢個四強席位含金量十足。而摩洛哥嘅出色表現，亦刷新咗非洲球隊喺世界盃嘅最佳成績。
佢哋防守力出眾，後防路曼沙斯、阿舒拉夫及對西班牙勇救十二碼嘅耶辛尼保奴外，中場奧拿希表現亦令人眼前一亮。效力法甲昂熱嘅佢，喺中場表現八面玲瓏，對西班牙嘅比賽，面對巴塞隆拿級數嘅三人中場組合亦不落下風，上仗對葡萄牙轉身反擊顯示其靈活程度，當防守需要遮綫時，出現時機恰到好處，需要身體對抗時亦毫不錫身。
當然呢位二十二歲嘅年輕人不是全無缺點，例如在組織攻勢嘅傳球選擇，或者引球出擊時機都可以做得更好，但無可否認以佢嘅年紀來講肯定不乏進步空間。嚟緊對法國嘅比賽，摩洛哥有好多主力受傷或停賽，呢位神奇小子嘅表現就更加關鍵，如果佢可以維持對西班牙及葡萄牙時嘅勇態，摩洛哥應可一拼。 -球樂
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應