世界盃2022｜專家分析:老黃忠睇得要睇
2022-12-12 13:45 
有人歡喜有人愁，喺八強折戟而歸嘅英格蘭令本港好多球迷心碎，比賽中十二碼宴客嘅哈利卡尼、老臣子佐敦軒達臣等於賽後難掩失望神情。而贏波晉級嘅法國，亦有帶着濕潤嘅眼角，慶祝之前不忘恭賀陣中嘅老將基奧特。
喺法國論名氣及天分，大家先諗到嘅一定係基利安麥巴比，而中鋒基奧特從來都同「天才」呢個形容詞沾唔上邊。對比法國一直出產技術出眾嘅前鋒，基奧特算係比較異類嘅存在：唔算出色嘅盤球技巧，但護球回傳技術出眾；速度唔高，但善於喺對手後衞中尋找空間；體格唔算特別出眾，但制空力強及頂上功夫相當出色。尤其今場喺對方包括哈利馬古尼在內的兩名中堅夾擊下，依然屢次爭頂成功，而且更於下半場頂入致勝球。不知不覺間今屆已經入咗四球與美斯並列神射手次席，更超越咗亨利成為法國隊史上入球最多嘅球員。
世界盃一直都係新星嘅搖籃，但係老當益壯老黃忠同樣值得大家欣賞。已經出局波蘭嘅施捷斯尼、葡萄牙嘅比比、繼續探戈嘅美斯、同埋上文筆者愛將基奧特等等，都係睇一場少一場，大家且睇且珍惜。 -球樂
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應