古天后日誌｜北水高追內房物管又中伏

12月12日，大致多雲，天氣乾燥，日間短暫時間有陽光，早晚天氣清涼。上周五美國公布PPI高過預期，美股三大指數下跌，道指跌305點，標指跟納指分別跌29點及77點。標指仍然守住3900大關，呢個係重要支持位，不過美股喺高位成交減少，反映資金再高追意欲不大。PPI環比增加並不意外，主要係期內油價從75美元反彈至93美元，資源價格中嘅銅價亦從每噸7300美元反彈至8500美元，本周二公布嘅CPI先至係市場較關心嘅通脹數據，要睇返CPI能否反映美國房價及房租回調，令CPI回落速度加快。值得留意係12月消費者信心指數升至59.1，高於市場預期57，即係美國零售銷售保持強勁，美國消費力強，美國整體經濟唔係太差。

美國經濟維持強勁，而10月低位入場博反彈嘅資金亦開始食糊，上週美國股票基金錄得266億美元淨流出，反過來貨幣基金錄得361億美元淨流入，資金開始變得保守。反映標指波動的VIX，亦從低位19反彈上22.8，假如VIX再升穿25，便要提防美股轉勢。

呢個星期四除咗有美國聯儲局議息之外，仲有英倫銀行及歐洲央行公布議息結果，市場普遍預期聯儲局加息0.5%，至於英、歐央行同樣加息0.5%已無懸念。為對抗通脹，預期美國聯儲局會將利率維持喺高位一段時間，不過10年債息回至3.4%，反映市場預期明年有可能掉頭減息，不過呢個減息預期有少少過度樂觀，明年息率能否掉頭回落，仍要睇通脹表現，暫時CPI數字未見大幅回落，呢個係美股喺現水平難再突破向上嘅原因。

至於港股呢邊，上周喺憧憬內地通關在即，上周五恒指邁向20000大關，成交則保持喺1994億元，周末前夕成交未有明顥縮水，反映資金對後市仍樂觀。不過古天后預期12月港股可挑戰19500至20000水平，目標已達，加上仲有個幾星期又到聖誕節及新年長假期，港股短線再大幅向上勳力大減，呢兩個星期或者要進入高位震盪期，現水平再追貨值博率大減，手上有貨可以持有。但再追貨古天后有所保留。

市場上周憧憬內地本周召開經濟會議，或再推出更多政策扶持內房股，北水上周積極掃貨，不過剛剛碧服(06098)就公布大股東減持舊股套現。碧桂園(02007)月內兩度配股為公司集資係無可厚非，內房水緊眾所周知，但大股東呢啲時間減持舊股套現，呢個舉動一係佢本人都水緊等錢使，另一原因難免令心懷疑現價嘅碧服差不多到價，大股東都唔想坐住咁多貨，所以善價而沽。人哋大股東減持，北水又高追中伏，過去北水多次高追低沽，屢見不鮮，所以話跟住北水炒作都好易成為韭菜被割，盲目跟隨未必有好結果。