世界盃2022｜專家分析:Respect Respect Respect
2022-12-11 07:59 
摩連奴當年帶領曼聯被熱刺以三比零擊敗之後，記者會入面嘅名句”Respect, Respect, Respect”，正是筆者睇完頭兩場八強賽事嘅感想。
兩場百二分鐘嘅比賽都要用十二碼分勝負。頭場克羅地亞對巴西，外界普遍認為今屆大熱門巴西勝出毫無懸念，但上屆亞軍克羅地亞由三名老將莫迪歷、高華錫和保素域將巴西進攻節奏完全打亂；而儘管巴西中場失勢，但尼馬依然不斷嘗試喺中路製造空間，結果不負眾望於加時上半場先馳得點！只係格仔軍團更以堅強嘅韌性於下半場尾段追成平手。
至於荷蘭對阿根廷，呢場五五之爭就更戲劇性。今場比賽阿根廷絕大部分時間控制戰局，美斯更以一傳一射兩球領先荷蘭。正當所有人都以為大局已定，荷蘭領隊雲加爾喺比賽末段換人調整戰術，利用高空攻勢改變比賽，後備前鋒韋格賀斯不僅喺八十分鐘扳回一城，更加喺補時最後一擊追平比分！而且華基爾雲迪積克帶領嘅防綫亦抵擋住阿根廷喺加時階段潮水般嘅猛攻。
球場乃英雄地，最後總有一方對結果感到失望。但有時拋開勝負，球賽戰術博弈嘅過程，球員未到最後絕不放棄嘅態度，亦值得筆者尊敬。 -球樂
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應