古天后日誌｜港股整固能守18000水平後市仍向好

12月2日，早上相當清涼，日間短暫時間有陽光。美股隔晚個別發展，美國10月個人消費開支(PCE)物價指數符合預期，但11月ISM製造業採購經理指數(PMI)逾兩年來首陷萎縮，美股個別發展。道指跟標指跌194點及3點，納指則升14點。標指逼近4100巨大阻力需要整固，目前美股正處於牛熊十字路口，即使鮑爺已放鴿，因為通脹似乎已初步受控，但淡友仍死心不息。美息喺就業市場平穩及通脹受控下見頂，資金risk on積極掃貨，10年債息回落至3.5%，預估明年息口見5%左右，債息反映未來兩年美息有超過1%下調空間。不過通脹隨時死灰復燃，暫時2023年內減息機會有限，亦唔好太早開心。

今晚美國將公布非農數據，市場預估新增職位20萬個，時薪增幅4.6%，失業率3.7%。美股氣氛已轉趨樂觀，新增職位增加，經濟放緩速度減慢，美股當然值得慶祝，相反，職位增幅少過預期，反映經濟轉弱，聯儲局又有條件放鴿。如此一來，美股今晚都唔會跌得去邊。美國嘅經濟都好靠內部消費，只要就業市場平穩，失業率維持喺4%之下，民眾消費力得以保持，美國經濟可保強勁。

至於凿股，由周初回調至17000水平止跌回升，一口氣升至19200水平，之前提及只要20及50日線守得住，再展升浪嘅18500至19000目標超額完成，短短四日升幅已達2400點，嚟到19000水平，有獲利盤套現亦屬正常。相信呢段時間港股需要回調整固，19000水平需要時間去企穩，周末前夕投資者減磅亦無可厚非。目前100日線下移至18400水平，呢個較早前嘅阻力位，已成為支持位，且看回調會否回補18600裂口，12月年結因素，仍然睇高一線，只要大市回調能守100日線，甚至退守至18000水平能靠穩，後市仍有條件向上挑戰19500水平，亦順理成章回補9月中所遺下嘅下跌裂口19300。不過大市要繼續向上，每日成交額要保持至少1200億元，否則喺缺乏資金支持下，港股只會停滯不前。