倫永亮開Show自爆脫墨被阿媽喪鬧 台上狂搞GAG有興趣開棟篤笑

一連兩場「倫永亮我是音樂人？」音樂會昨日在西九戲曲中心舉行，今次舞台用上大量幻燈片，燈光襯托音樂會演出，倫永亮（Anthony）以一曲《從何唱起》道出當年選擇學彈琴曾受到家人阻攔，認為不是一份能賺到錢的工作，幸仍有母親支持。Anthony又與兩位舞台劇演員Rick、Maraget即席演出多個小劇場，自嘲曾被人笑肥、脱節，但最後却堅持下來，因為仍有支持他的人，更展現自己其實都好跟到現在的「潮語」，「搭到咀」，又與三位敲擊樂手合奏演唱。

Anthony自爆當年因傷風看醫生，口痕問唇上的墨可否脱，怎知醫生二話不說，即時拎出一套古老有銹的工具，電光火石間幫他脱了，回家後被母親大駡為何脱墨咁大件事都不和家人商量，仲要脱咗粒「食」墨。不過Anthony笑言醫生手勢好，無留疤痕，脱咗又好似靚仔咗。記者問到事業有冇好到，他也笑可能仲紅咗！

此外，Anthony當年曾在美國酒吧演出，由於英文名很有宗教感覺，特意改名叫Jess，不過回港後又改回Anthony，觀眾即大叫他Jess，場面搞笑。騷後受訪時問到台上咁多笑話，會否考慮開棟篤笑？Anthony戲稱黃子華「比他好啲咁」，不過都希望有天自己能開到！

久違的葉德嫻亦有捧場。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ