西貢行山跌落1米深坑待救一晚 死裏逃生事主：以為跌落棺材窿
2022-11-19 16:04 
踏入12月正是行山好季節，卻不時聽聞有行山人士樂極生悲墮崖慘劇，能生還者是不幸中之大幸。行山人士簡先生便是其中之一，簡生在今日跨部門宣傳山友同行計劃活動中，分享他當日獨自行山受傷獲救的經歷，呼籲山友勿單獨行山，最好結伴同行。
相關報道：秋冬獨自行山失蹤死亡率急升 當局籲下載「郊野樂行」程式助追蹤定位
簡生自言行山20多年，家住西貢的他，每早起床便行落沙灘，然後返工。今年1月9日他選擇行了一條平時很少人行的山路，起步點為西貢露營灣上山，沿着前人綁起的絲帶前行，來了一條半山徑，卻有個約5呎深的大窿被草遮蓋，「我完全睇唔到，一腳就叉咗落去，嘭一聲瞓低撼到坑邊，失去知覺暈咗，醒返完全郁唔到癱咗咁，伸手去背囊想攞電話出嚟打都打唔到，一路等到差唔多天黑，好多消防車、救護車聲，我心諗今次得救啦，實冇死，咁多人嚟搵。」
「我仲聽到有搜索犬聲，我搏命大叫，叫咗好耐，冇人救我，我其實離路邊唔係好遠，大約500公尺。可惜跌咗落坑裏面，啲雜草遮住我，咁樣聲音唔能夠傳出去，消防員個個都聽唔到我啲呼救聲，我就好驚，附近周圍都係墳墓，清末民初古墓，自己一直以為跌咗落棺材窿裏面，我唔係好怕死，但我好驚家人傷心，尤其我太太嗰日喊到不似人形。」
「到咗第二日（10日），路邊好嘈雜，繼而聽到有直升機喺我上空盤旋，可惜我跌咗落個窿裏面，畀雜草遮住，佢哋（救援人員）冇辦法發現我，於是我狂叫，冇幾耐終於有人發現我叫，原來佢哋係民安隊，將我救出嚟，送咗我去伊利沙伯醫院。」
「我住院一個月，我算非常好彩，做咗手術，用咗3條鋼片，8口螺絲，將斷裂嘅骨駁回，將大部分壓住神經線收復好，但仲有2條神經線壓住我，行起上嚟好唔平衡，手腳都好麻痺。我想藉呢個機會同大家呼籲一下，唔好單獨行山，一旦有意外發生就非常危險。最好選擇人流多地方去行，謹記結伴遠足，有事可互相支援。我亦好感謝當日嘅拯救隊伍。」
而當日負責拯救簡生的民安隊搜救中隊第 6分隊指揮官王少珊亦憶述，今年1月10日大約8時，民安隊應消防處要求前往西貢露營灣協助搜索懷疑行山失蹤的簡生。當日民安隊一共派出 10 名人員進行搜救。當到達目的地後，民安隊與警方及消防員商討搜索範圍。經評估當時形勢，決定於竹角、白水碗及碧水新村一帶搜索。搜索期間，民安隊在搜索範圍聽到有微微呼救聲，需要進一步深入叢林尋找，終在約近早上11時，成功於竹角山對落大約 20米叢林找到簡生，他跌落大約1米深坑入面，清醒但身體虛弱，民安隊隨即進行初步急救及安撫，同時消防及警察亦前來支援。最終成功將簡生安全地抬離現場帶落山。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應