古天后日誌｜大市高位整固 守萬八仍可睇高一線

11月16日，大致多雲，日間部份時間有陽光。隔晚美股表現反覆，早段三大指數顯著上升，其後波蘭境內被導彈射中，地緣政治風險上升，美股急轉直下，道指曾倒跌逾200點，其後三大指數仍保持升幅，暫時呢期喺美債息回落至4%之下，科技股表現較佳，但美股又再進入超買範圍，嚟緊呢段時間走勢會愈趨反覆。

繼CPI數字令市場憧憬加息步伐或減慢，隔晚公布嘅PPI進一步引證通脹有可能已見頂，除咗加息步伐放緩外，明年甚至有可能於下半年息口掉頭向下。美匯指數跌穿110後，跌勢加快，反映資金開始流出美元區，投資者更加積極，並於新興市場及估值低殘嘅股市尋找機會。

中概股喺息率掉頭向下，美匯下跌，人民幣反彈勢頭持續下回升，帶動港股由上月低位反彈逾3000點，而近港股能保持強勢，連續兩日成交保持於2000億以上，反映有資金願意在17000水平之上繼續追貨，暫時50日線17200水平已穩守，大市能企穩此水平，仍有望繼續向上挑戰100日線，即約18800水平。暫時守住18000水平，可繼續持貨，一旦失守，相反要減磅。

板塊方面，幾隻重磅科技股，包括騰訊(00700)、阿里(09988)、京東(09618)等，呢幾日輪住公布業績，唔排除借業績再炒高，並將指數推高至100日線水平。留意業績若不似預期，相關股份或有機會調整，留意騰訊阻力大約喺300-320, 美團(03690)阻力170-180，京東阻力220-230，阿里阻力80-85元，有貨就睇住業績公布，呢啲阻力位未能上破，就好食糊走人。