陳曉東隔3年再開騷《百分百感覺》合體 與方力申台上爆鍾意周勵淇
2022-10-23 13:37 
陳曉東昨晚在西九竹翠公園舉行「HARBOUR THE SONIC」演唱會，闊別三年香港舞台的東東以白馬王子Look現身，唱出《結他》、《新曲加精選》及《心理遊戲》為個唱揭開序幕，東東更與接近20個萬聖節打扮的dancers邊跳邊唱，搞到台下歌迷依哇鬼叫。
【相關閱讀】：香港小姐再競選丨陳曉東兩個女行街遇星探 唔想囡囡太快接觸娛樂圈
【點擊睇東東演唱會相片】：
快歌過後，東東換上粉紫國王Look唱出大熱冧歌《一個人》、《迷你》及《愛你躲你》，由於開場前曾下起毛毛雨，唱到滿頭大汗的東東就說：「啲雨水打喺我臉上就得。」之後他又感謝大家來睇騷，更指選這個場地，是希望大家能吹住海風一起回憶從前。
東東之後說這3年來大家也經歷了很多，在大環境不斷變化下迎接新時代，知道這過程會產生恐懼與忐忑感：「我唔止一次經歷，而家遇上轉變都會有忐忑心情。」不過他指一路以來因身邊有一班支持自己的好友及歌迷等，令他感到很溫暖，更即場感謝前經理人羅嘉慧、夏妙然及陳少寶等好友一直以來的支持和陪伴，之後他又扮呷醋，與歌迷講笑話：「以前你哋唔係話最鍾意係我？而家身邊啲男仔邊個嚟？」
到東東返回後台換衫時，螢幕上播放他兩位寶貝女自彈自唱《心有獨鍾》，之後東東企上流動舞台與歌迷作近距離接觸，令氣氛超high，返回舞台後，他表示好熱，台下歌迷隨即大叫「除衫」，他即扮傻說：「3除3等於1，6除2等於3。」之後他又在點唱環節分享當年因沒有人幫他填詞，故自己寫了《感覺瞬間》這首歌。當嘉賓DJ KING出場時，東東就揀來近期在影壇大熱的古天樂歌曲《今期流行》，唱《芳華絕代》時又向觀眾狂派咕𠱸，之後唱出《打開天空》時，high爆的東東更讓拿着水槍的Dancer狂噴自己，又扯開西裝露肉派福利。
到Encore環節，東東與曾合作拍攝網劇《百分百感覺》的方力申及周勵淇(Niki)一起出場合唱《兩男一女》，他們表示因拍劇而成為好友，小方指剛剛音樂響起時起雞皮：「原來呢隻歌已經至20年前，記得當年拍劇嘅時候我仲讀緊書，東東好好，拍完劇之後揸架紅色嘅法拉利車我返屋企。」小方又自爆當年自己真的喜歡Niki，東東聽後即話：「我都鍾意，不過冇講！」小方聽後反問他為何當年沒有揸法拉利車Niki？東東就搞笑地說：「我車咗你，你咪唔使煩住Niki！」小方又指自己當年收工後也不離開片場就是因為Niki，而Niki聽後即説：「點解你而家先講，你早啲講可能我哋得呢。」小方就語帶暗示話：「得，但都可能未必走到最後。」Niki即笑著叫小方不要將自己的愛情故事放在她身上，又謂自己與東東現在已組織家庭，叫小方要加油，而東東則預備了賤兔公仔與拳套送給兩人。
東東之後又感性地表示做這個演唱會遇上很多困難，除了舞台上有改動外，開騷前幾日亦打風，到開騷前又落雨：「我好驚呀真係，係呢幾個月要面對呢個演唱會其實起伏好大......有好多好攰嘅時候，我經常同自己講，一切來之不易，所以我要用我最好嘅態度去面對呢份我熱愛嘅職業。」東東之後又感觸地表示有時候覺得自己不被理解，當被誤解的時候，他就會合上雙眼然後傾聽自己心裏的聲音，而這時他開始講到哽咽，他說：「或者我呢一世人真真正正擁有嘅就係呢份心跳聲，我要真係去聽我內心入邊話俾我聽我做嘅選擇，就算我踏出嗰步，我真係失敗嘅話，我同我自己講，一切都係我心甘情願。」
完騷後，東東接受訪問時表示鬆一口氣，對於今晚表現，他給自己85分，因這是他首次做戶外騷，加上因場地有很多限制，故準備演唱會時有好多難關：「幾個升降台、大屏幕同激光唔通過審批，舞蹈員萬聖節服裝騷前兩個禮拜我先訂，我自己訂，如果佢寄唔切，我就要再諗辦法。」他更指紫色歌衫臨開騷前才運到，一着上身就要上台，雖然困難重重，但他非常享受跟歌迷聚會，未來亦希望做多些新歌，問到他剛才在台上表示被誤解，他聽後即說：「唔講喇，明就明啦！」而他又感激老婆從北京來港幫忙打點一切，更透露稍後將會去先放假，去旅行差電。
【其他文章】：
台灣金鐘獎出現全球史上首位女視帝 《華燈初上》入圍11項捧蛋
星光熠熠｜許志安復出首場騷重踏4年前同黃心穎拖手合唱《會過去的》舞台：過去就過去
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應