獨家丨葉念琛再爆《美麗戰場》劇情　方力申超絕冧招私有陳瀅

2022-10-17 08:00

葉念琛繼續向《星島頭條》預告《美麗戰場》劇情，本周故事重點落在選美會，除了有「阿寶」和「反骨琪」的競爭，還有台前幕後的明爭暗鬥，葉導更叫大家估吓陳瀅演的「阿寶」和小方演的「宇少」，究竟有邊個名人影子！？他仲大爆「阿寶」將會俾「宇少」的冧女絕招媾掂！採訪：杜杜

上周尾聲「反骨琪」回歸，參與港姐面試時爆喊「演技」獲讚。

「阿寶」和「反骨琪」重逢，又開始另一場惡鬥。

劇集播出兩周，暫時飾演「反骨琪」的蔣家旻演技獲讚，更被捧紅，但身為女主角「阿寶」的陳瀅演技卻被狠批，葉導即為她平反，仲劇透「阿寶」往後發展，「一星期可以捧紅咗『反骨琪』蔣家旻，但係『阿寶』個角色咁多爭議係預期之內，因為蔣家旻個角色係攻，陳瀅個角色係守，陳瀅自然會冇咁出，不過大家等吓啦！之後『阿寶』係比『反骨琪』有過之而冇不及。」

「阿寶」由屋企的戰場，再到選美另一個戰場。

葉導預告，「阿寶」未來發展會仲衰過「反骨琪」。

揭選美會內幕
上周劇情尾聲「反骨琪」回歸，由以往MK妹變千金小姐再現身，葉導形容是升級版，連她對住評判的戲一樣有升級。葉導就預告本周劇情繼續以選美會為主，大家除了要留意「阿寶」和「反骨琪」繼續惡鬥外，還要注意兩女的後台同樣在角力，還有她們亦要跟其餘十位參選佳麗明爭暗鬥，「以往講選美通常講台前，今次會講埋後台，係咪揭選美會內幕，就要觀眾自行分析。」葉導又提提大家要注意，「嗰十個後選佳麗本身連登仔都會認識，而樊亦敏係個重要角色。」

除了「阿寶」和「反骨琪」，葉導叫大家要留意其他佳麗。

樊亦敏演的「Cat姐」是本周值得留意角色。

網民除了討論劇情，還迷上估劇中角色「原型」，譬如陳山聰演的「王一言」就被指以黃栢高（Paco）作藍本，看到這個現象葉導都覺得好有趣，「大家好鍾意對號入座，係幾有趣嘅，但係作為製作人，我當然唔會講係邊個，同埋好多時藍本可能唔止得一個，因為我哋唔係拍緊《娛樂插班生》，但係咁樣估吓係好玩嘅。」見大家玩得開心，葉導就出題畀大家繼續估，「陳瀅戲裹面個英文名係專登叫『Michelle』，而同佢演一對嘅方力申（宇少）會出場，佢咁耐都未試過戴眼鏡演戲，我堅持要佢戴，大家自己估吓點解啦！」

陳山聰演的「王一言」，被指原型是Paco。

方力申演的「宇少」，成為選美會評判因而認識「阿寶」。

好姊妹將反目
葉導又見觀眾對張馳豪演的「家明」，追「阿寶」整「女朋友麵」（即餐蛋麵）冧女，被大讚浪漫，於是忍唔住再劇透，「大家要留意第十二集，小方追阿瀅嘅方法仲誇張，係另一種嘅冧女方法，但係大家唔會學到，女仔一定會冧，睇完大家就會明白佢點解會追到『阿寶』，咁追法應該冇女仔會拒絕。」

「阿寶」同「家明」這段初戀，都有不少浪漫位。

「宇少」會以超強冧女招數私有化「阿寶」。

除了陳瀅跟小方這對緋聞情侶談情要留意外，葉導認為劉佩玥（Moon）和林盛斌（Bob）這一對觀眾亦會鍾意，仲大讚Moon演得好，「大家暫時幾鍾意Moon演嘅『靜兒』，佢個角色係難演，暫時冇乜嘢做咁，只係一個好朋友嘅角色咁出現，但係每個人都會希望有個『李靜兒』咁嘅好朋友喺身邊，但係一個咁有義氣嘅好朋友會好容易受傷，大家如果代入咗佢哋三個好姊妹嘅友情，嚟緊會見到佢哋反目會好心痛。」