吳浩康兒子出世喇 郭思琳陣痛足17小時連護士都讚忍得
2022-09-20 13:41 
吳浩康今年年初與前港姐郭思琳奉子成婚，今日終於傳出喜訊，兩人的囝囝已在本月14日出世，榮升爸爸媽媽！Deep今日透過公司公佈喜訊：「BB係男仔。改名方面而家仲同爸爸磋商緊。太太原本諗住順產，但係去到醫院嘅時候個子宮頸仲未打開，未ready畀囝囝出嚟，醫生建議落催生藥。落咗催生藥後會不時有陣痛，仲要係幾犀利嗰種。太太一路承受住痛楚，醫生同護士同佢講子宮頸未ready，唔ready嘅程度係，人哋有一至十度，我太太係一度都冇，太太內心失望之餘亦都好擔心，當然佢亦都好期待囝囝嘅出現，但始終冇呢方面嘅經驗，所以就會擔心啲，佢足足經歷咗17個鐘頭嘅呢個狀況。」Deep還稱自己親手剪臍帶。
郭思琳的忍痛程度，Deep坦言連護士見到他都忍不住說：「其實你太太真係好忍得痛，佢可以咁樣頂，仲頂咗咁多個鐘。」有過生仔這經歷，Deep很佩服太太：「真係好多謝佢，一啲都唔簡單，希望我可以繼續好好配合佢嘅生活啦，最後多謝大家、媒體對我哋一家人嘅關心、所有人對我哋嘅祝福，多謝晒。」
另一方面，新手媽咪郭思琳亦在IG分享自己做媽咪的心情：「呢十個月以嚟唔知幻想咗幾多次你係點嘅樣，一直知你係大碼B，只係估唔到有份量成咁，亦估都估唔到自己肚仔可以佗到個8磅11嘅BB…怪唔知催生咗17個鐘你都唔肯出嚟啦，原來係大件到出唔到嚟。」她又稱整個生B過程令她痛不欲生：「最難捱嘅係好想順產，但一直催生到開刀前都等唔到宮頸打開，淨係不斷地feel到劇烈陣痛…. 不過最後見證住你平安出世，呢樣先係最緊要!（我仲好記得喺產房Deep爸爸聽到你第一下喊聲，佢開心到好似中獎咁成個彈起!）」
作為一個新手媽咪，郭思琳表示自己即使全無經驗，但與Deep會盡量去學，盡量去做，用所有愛同耐心陪伴兒子長大，希望有一個開心嘅童年，最後她感謝醫生和護士之餘，當然不忘感謝老公：「喺我痛到頂唔順要聞住笑氣等開刀嘅時候，有你喺我身邊陪住我，呢個支持真係好緊要！多謝你喺我身邊陪我一齊見證住撑撑出世！」
【相關閱讀】：
港姐亞軍發展贏冠軍？張曼玉同屆冠軍衰全裸淡出 張秀文受力捧嫁金融才俊
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應