古天后日誌｜港股會否穿底難測 暫離場觀望保平安

9月20日，間中有幾陣雨，短暫時間有陽光，天氣仍然炎熱。美股隔晚先低後高，低開後最終三大指數倒升收，主要係市場普遍預期今次議息只會加息0.75%，加息1%嘅機會有兩成左右。不過焦點仍然係會後嘅議息聲明，會唔會有11月加息提示，若然9月份只加息0.75%，11月會否再加0.75%?? 雖然暫時未有議息結果，但10年債息已升至3.5%。

美股上周消化咗唔少壞消息，淡友當然把握平倉機會，尤其當FDX發盈警，大幅睇淡下半年業績，即引發市場悲觀情緒，因為擔心美國經濟將走下坡。不過嚟呢個星期，情況又唔同咗，TSLA完成上海工廠產能升級，有助提升全年交付量，股價彈返接近2%。iphone 14Pro熱賣，AAPL急急Iiphone 14嘅生產線改為生產14Pro，以滿足需求，股價亦反彈2.5%。不過拜登講咗句疫情大流行已過去，因為11月中期大選，佢當然係要講吓呢啲嘢拉票，既然疫情已過，醫藥股插水，MRNA股價跌至5月低位，隔晚股價再跌7%。至於中概股噚日跟大勢反彈，今日相關股份應該會喺港股做返好啲。

美匯指數升抵110前見阻力，強美元令新興市場貨幣倒水，但又同時面對高通脹，只有局住加息，南美國家就面對呢個問題，而亞洲國家亦避面唔到資金流走，人民幣見七算後，毫無招架之力。阿爺項多係限乮美元匯出，但人仔穿咗七算，人民幣壓力更大，好彩嘅係內地仍錄得貿易盈餘，今年頭8固月嘅外資投資繼續錄得增長，不過美國持續縮表下，中國往後日子都難捱。

港股跌穿19000關後，噚日再下試18500水平，距離3月低位只有一步之遙，雖然沽壓唔算嚴重，亦開始見淡友平倉，可惜仍然係無人肯入場撈貨，以騰訊(00700)例，日日用幾億回購，但股價已回落下試上月低位，市場無人跟進。港股已進入陰乾階段，即使個別股份已回落至合理，甚至吸引水平，都只能小注慢慢收集，會唔會穿3月底部，又或者何時真正見底，暫時睇唔到，只能步步為營，甚至離場觀望。