獨家丨陳展鵬拍《黯夜》中環街頭喪跑 做咗老竇唔錫身起飛腳搏命打

陳展鵬最近在劇集《黯夜守護者》再演警察，展鵬形容今次角色「高輝」多年前曾做卧底，係個「hea吓hea吓」嘅人，不過講到查案依然好有火。演得警察難免有動作場面，不過《星島頭條》探班時，出名搏命的展鵬竟然笑指，今次好鬼輕鬆，因為「粗重嘢」留返畀前輩李成昌和黃栢文，睇真動作場面都唔少，但係對於拍慣動作戲嘅展鵬嚟講，全部只係碎料！採訪：杜杜 攝影：娛樂組

展鵬身手出名好，踢吓人打幾吓梗係輕鬆搞掂。

講到今次角色，展鵬話好少做呢類不修邊幅角色，都覺得幾好玩，「角色係比較hea吓hea吓咁，頭髮又唔係點吹，好似睇化咗個世界，但係又未去到冇咗團火，只係好多嘢覺得呢個世界係咁㗎啦！」

戲中陳煒跟囝囝俊仔關係唔好，展鵬出手做和事佬。

做咗老竇都唔錫身

探班其中一場戲，講展鵬追住陳煒戲中囝囝「俊仔」（楊凱博飾）由中環鬧巿跑到去中環碼頭，因為讀中四嘅俊仔正值反叛期，跟媽咪關係好差，仲跟埋班古惑仔玩，展鵬好言相勸，點知「俊仔」為咗避展鵬寧願選擇跳海。雖然戲中兩人都要跳海，但導演安排咗替身幫手，只係跑吓追吓人咁，對展鵬嚟講絕對零難度啦！

「俊仔」黐埋班古惑仔一齊玩。

 

展鵬由中環鬧巿一直追俊仔到中環碼頭。

展鵬諗住勸俊仔見陳煒，反而嚇到佢跳海。

至於另一場戲，就講展鵬為救做卧底時跟過嘅大佬李成昌同黃栢文，同班古惑仔大打出手，不過作為警察救人有槍幫手，打起上嚟都唔算太辛苦，反而李成昌同黃栢文啲打戲仲甘，黃栢文仲為展鵬捱咗一刀。展鵬就講笑話：「動作嘅嘢交畀啲前輩去做，畀晒成昌哥同栢文哥囉！哈哈！我主要係揸槍㗎嘛！就唔使咁多動作啦！」問到展鵬拍動作戲，會否因有了家庭做埋老竇會更加錫身，佢就好肯定話絕對唔會，「做嘢始終都要有個專業喺度，同埋基本上公司拍嘢都好安全。」

成昌哥反而有唔少打戲，不過佢一樣應付自如。

展鵬跟栢文哥曾是黑幫兄弟，見到對方有難梗要出手。

展鵬雖然有咗家庭，佢話拍動作戲都唔會錫身。

 

《黯夜守護者》探班

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ